8 મહિનાની પ્રેગ્નેન્ટ મહિલાને હેલ્મેટ ન પહેરવાના ગુનામાં પોલીસે ત્રણ કિલોમીટર ચલાવી, પોલીસ ઇન્ચાર્જ સસ્પેન્ડ

નવી દિલ્હી: ઓડિશામાં પોલીસ (Odisha police)ની માનવતા મરી પરવારી હોય તેવો એક બનાવ ધ્યાનમાં આવ્યો છે. આ બનાવ ધ્યાનમાં આવ્યા બાદ જિલ્લા પોલીસ વડા (Superintendent of Police)એ પોલીસ સ્ટેશન ઇન્ચાર્જ(Rina Baksala) ને સસ્પેન્ડ  કરી દીધા છે. મયુરભંજ જિલ્લાના પોલીસ વડા સ્મિથ પરમારે (Smith Parmar) સરત પોલીસ સ્ટેશનના ઇન્ચાર્જ રીના બક્સાલાને રવિવારે એક આઠ મહિનાની પ્રેગ્નેન્ટ મહિલાને ત્રણ કિલોમીટર સુધી ચાલવા માટેની ફરજ પાડવાના ગુનામાં સસ્પેન્ડ કરી દીધા છે.મહિલા અને તેના પતિને ત્રણ કિલોમીટર સુધી ચાલવાની ફરજ પાડવાથી મહિલાની તબિયત બગડી હતી. આ દરમિયાન ખૂબ જ તડકો હોવાથી મહિલાને સારવાર માટે હૉસ્પિટલમાં લઈ જવી પડી હતી. આ મામલે ઉચ્ચ પોલીસ અધિકારીને ફરિયાદ કરવામાં આવ્યા બાદ પોલીસ સ્ટેશન ઇન્ચાર્જ સામે પગલાં ભરવામાં આવ્યા છે. આટલું જ નહીં, તેમની સામે ખાતાકીય તપાસનો પણ આદેશ કરાયો છે.