ICC વર્લ્ડ કપમાં ઈંગ્લેન્ડનું ખરાબ પ્રદર્શન જારી રહ્યું છે. તેને વર્લ્ડ કપ 2023માં સતત ત્રીજી હારનો સામનો કરવો પડ્યો છે. બેંગ્લોરના એમ ચિન્નાસ્વામી સ્ટેડિયમમાં રમાયેલી મેચમાં ઇંગ્લેન્ડને શ્રીલંકા સામે 8 વિકેટે કારમી હારનો સામનો કરવો પડ્યો હતો. આ મેચમાં ટોસ જીતીને પ્રથમ બેટિંગ કરવા આવેલી ઈંગ્લેન્ડની ટીમ 33.2 ઓવરમાં 156 રનમાં ઓલઆઉટ થઈ ગઈ હતી. જવાબમાં શ્રીલંકાએ 25.4 ઓવરમાં 2 વિકેટના નુકસાને 160 રન બનાવીને જીત મેળવી હતી.
હાર બાદ જોસ બટલરનું મોટું નિવેદન
ઇંગ્લેન્ડના કેપ્ટન જોસ બટલરે શ્રીલંકા સામેની હાર બાદ સ્વીકાર્યું હતું કે ટૂર્નામેન્ટ તેના માટે ખૂબ જ નિરાશાજનક રહી છે. ટીમ પોઈન્ટ ટેબલમાં 10 ટીમોમાં નવમા સ્થાને છે. બટલરે કહ્યું કે તે ખૂબ જ મુશ્કેલ અને નિરાશાજનક ટૂર્નામેન્ટ રહી છે. હું મારી જાત અને તમામ ખેલાડીઓથી નિરાશ છું કે તેઓ અપેક્ષા મુજબ પ્રદર્શન કરી શક્યા નથી. અત્યારે આનો કોઈ સ્પષ્ટ જવાબ નથી. તેણે વધુમાં કહ્યું કે અમારી પાસે ઘણા અનુભવી ક્રિકેટરો છે, આત્મવિશ્વાસથી ભરેલા છે. તમે રાતોરાત ખરાબ ખેલાડી નથી બની જતા, તમે રાતોરાત ખરાબ ટીમ નથી બની જતા. મને લાગે છે કે આ સૌથી મોટી નિરાશા છે કે અમે હજુ સુધી અમારી શ્રેષ્ઠ ક્ષમતા પ્રમાણે રમી શક્યા નથી અને તેના માટે કોઈ સ્પષ્ટ કારણ નથી. આ સમયે કોઈની સામે આંગળી ચીંધી શકાય નહીં.
શ્રીલંકાને સેમી ફાઇનલમાં પહોંચવાની આશા છે
ડિફેન્ડિંગ ચેમ્પિયન ઈંગ્લેન્ડ સામેની એકતરફી જીત બાદ આત્મવિશ્વાસથી ભરેલા શ્રીલંકાના કેપ્ટન કુસલ મેન્ડિસે આશા વ્યક્ત કરી હતી કે તેમની ટીમ વર્લ્ડ કપના બાકીના લીગ તબક્કામાં સારું પ્રદર્શન કરીને સેમિફાઈનલમાં જગ્યા બનાવવામાં સફળ રહેશે. પાંચ મેચમાં ટીમની આ બીજી જીત છે. મેન્ડિસે કહ્યું કે નેટ રન રેટમાં થયેલો સુધારો અમારા માટે ઘણો સારો છે. અમે શરૂઆતની કેટલીક ઓવરોમાં ખૂબ સારું પ્રદર્શન કર્યું અને પછી ચાલુ રાખ્યું. આજે બધાએ ખૂબ જ સારું પ્રદર્શન કર્યું. અમારી પાસે હજુ ચાર મેચ રમવાની છે, મને લાગે છે કે જો અમે સાથે આવીને આવું પ્રદર્શન કરી શકીશું તો અમારી પાસે સેમિફાઇનલમાં પ્રવેશવાની તક હશે.
આ ખેલાડીઓએ શ્રીલંકા માટે શાનદાર પ્રદર્શન કર્યું હતું
આ મેચમાં શ્રીલંકાના બોલર લાહિરુ કુમારાએ શાનદાર બોલિંગ કરી હતી અને 7 ઓવરમાં 35 રન આપીને 3 વિકેટ ઝડપી હતી. જ્યારે રજિતા અને મેથ્યુઝે 2-2 વિકેટ લીધી હતી. મહિષ તિક્ષાને એક વિકેટ મળી હતી. ઈંગ્લેન્ડના 157 રનના લક્ષ્યનો પીછો કરતી વખતે શ્રીલંકાના ઓપનર પથુમ નિસાંકા અને સદિરા સમરવિક્રમાએ 132 રનની મોટી ભાગીદારી કરી હતી. નિસાન્કાએ 83 બોલમાં 7 ચોગ્ગા અને 2 છગ્ગાની મદદથી 77 રન બનાવ્યા હતા જ્યારે સાદિરાએ 54 બોલમાં 7 ચોગ્ગા અને એક છગ્ગાની મદદથી 65 રનની અડધી સદી ફટકારી હતી.
