IPL 2024: ઈન્ડિયન પ્રીમિયર લીગ (IPL)ની 17મી સીઝનમાં અત્યાર સુધી 35 મેચ રમાઈ છે, જે બાદ વિરાટ કોહલીએ 361 રન સાથે ઓરેન્જ કેપની યાદીમાં પ્રથમ સ્થાન પર પોતાનો દબદબો જાળવી રાખ્યો છે. હવે આ સિઝનમાં વિસ્ફોટક બેટિંગ કરતા જોવા મળેલ ટ્રેવિસ હેડ તેની નજીક પહોંચી ગયો છે. દિલ્હી કેપિટલ્સ સામેની મેચમાં માત્ર 32 બોલમાં 11 ચોગ્ગા અને 6 છગ્ગાની મદદથી 89 રનની તેની ઈનિંગ્સ સાથે હેડે આ સિઝનમાં અત્યાર સુધી સૌથી વધુ રન બનાવનારા બેટ્સમેનોની યાદીમાં સીધા બીજા સ્થાન પર કબજો કરી લીધો છે. જો પર્પલ કેપ લિસ્ટની વાત કરીએ તો કુલદીપ યાદવ પણ ટોપ-5માં પ્રવેશી ગયો છે.
હેડે આ સિઝનમાં અત્યાર સુધીમાં 324 રન બનાવ્યા છે
IPL 2024માં ટ્રેવિસ હેડના પ્રદર્શનની વાત કરીએ તો તેણે 6 મેચમાં 54ની એવરેજથી 324 રન બનાવ્યા છે, જેમાં તેનો સ્ટ્રાઈક રેટ 216 હતો. હેડના બેટથી બે અડધી સદી અને એક સદી પણ જોવા મળી છે. આ યાદીમાં વિરાટ કોહલી પહેલા સ્થાન પર છે, હવે રિયાન પરાગ 318 રન સાથે ત્રીજા સ્થાને પહોંચી ગયો છે, આ સિવાય રોહિત શર્મા 297 રન સાથે ચોથા સ્થાને છે જ્યારે કેએલ રાહુલ 286 રન સાથે પાંચમા સ્થાને છે. . સનરાઇઝર્સ હૈદરાબાદ ટીમનો ખેલાડી અભિષેક શર્મા પણ હવે આ સિઝનમાં સૌથી વધુ રન બનાવનારની યાદીમાં 10માં સ્થાને પહોંચી ગયો છે, જેમાં તેણે 7 ઇનિંગ્સમાં 36.71ની એવરેજથી 257 રન બનાવ્યા છે.
કુલદીપ યાદવે ટોપ-5માં પ્રવેશ કર્યો
આઈપીએલની 17મી સિઝનમાં અત્યાર સુધી સૌથી વધુ વિકેટ લેનારા ખેલાડીઓની યાદી પર નજર કરીએ તો જસપ્રીત બુમરાહ 13 વિકેટ સાથે પ્રથમ સ્થાને છે. સનરાઇઝર્સ હૈદરાબાદ સામેની મેચમાં 4 વિકેટ લીધા બાદ કુલદીપ યાદવ હવે 10 વિકેટ સાથે પર્પલ કેપની રેસમાં 5માં સ્થાને પહોંચી ગયો છે. સૌથી વધુ વિકેટ લેવાના મામલે યુઝવેન્દ્ર ચહલ અને ગેરાલ્ડ કોએત્ઝી 12-12 વિકેટ સાથે બીજા અને ત્રીજા સ્થાને છે. ચોથા સ્થાને મુસ્તાફિઝુર રહેમાન છે જેણે અત્યાર સુધી 11 વિકેટ ઝડપી છે.
