એશિયન ચેમ્પિયન્સ ટ્રોફીમાં હરમન સેનાએ ફરી પાકિસ્તાનને આપી કારમી હાર

એશિયન ચેમ્પિયન્સ ટ્રોફી 2024માં પોતાનું અજેય અભિયાન ચાલુ રાખતા ભારતે પાકિસ્તાનને પણ હરાવ્યું છે. સેમીફાઈનલની ટિકિટ બુક કરાવનાર હરમનપ્રીત સિંહની આગેવાની હેઠળની ટીમ ઈન્ડિયાએ પાકિસ્તાનને 2-1થી હરાવ્યું હતું.

ભારતે 14 સપ્ટેમ્બરે એશિયન ચેમ્પિયન્સ ટ્રોફીની તેમની છેલ્લી ગ્રૂપ-સ્ટેજ મેચમાં કટ્ટર હરીફ પાકિસ્તાનને 2-1થી હરાવતાં તેમનું વર્ચસ્વ જાળવી રાખ્યું હતું. ડિફેન્ડિંગ ચેમ્પિયન ટીમ ઈન્ડિયાએ શાનદાર રમત બતાવીને પાકિસ્તાનને હરાવ્યું. સેમિફાઇનલ માટે ટિકિટ બુક કરાવનાર હરમનપ્રીત સિંહની આગેવાની હેઠળની ટીમ હજુ પણ ટુર્નામેન્ટમાં અજેય છે. ભારતીય કેપ્ટન હરમનપ્રીત સિંહે ટીમ માટે બે ગોલ કરીને ભારતની જીત સુનિશ્ચિત કરી હતી.

વિજયના રથ પર સવાર ભારત

એશિયન ચેમ્પિયન્સ ટ્રોફીમાં ટીમ ઈન્ડિયા જીતના રથ પર સવાર થઈ રહી છે. છ ટીમોની રાઉન્ડ રોબિન ટૂર્નામેન્ટમાં ભારતની આ સતત પાંચમી જીત છે. પાકિસ્તાને અહેમદ નદીમે (8મી મિનિટે) ગોલ કરીને લીડ મેળવી હતી, પરંતુ હરમનપ્રીત સિંહ (13મી અને 19મી મિનિટ)એ બે પેનલ્ટી કોર્નરને ફેરવીને ભારતને જીત અપાવી હતી. આ મેચ પહેલા ભારત અને પાકિસ્તાન બંને અંતિમ ચાર માટે ક્વોલિફાય થઈ ગયા હતા. રાઉન્ડ રોબિન ફોર્મેટમાંથી ટોચની 4 ટીમો 16 સપ્ટેમ્બરે યોજાનારી સેમિફાઇનલ માટે ક્વોલિફાય થશે જ્યારે ફાઇનલ 17 સપ્ટેમ્બરે યોજાશે.

હરમનપ્રીતે બે ગોલ કર્યા હતા

ભારતનું ડિફેન્સ લથડતું જોવા મળ્યું હતું, જેના કારણે પાકિસ્તાનને શરૂઆતમાં એક ગોલની લીડ મળી હતી. જો કે, ભારતની આક્રમક રેખાએ ઝડપી વાપસી કરી અને પેનલ્ટી કોર્નર મેળવ્યો. કેપ્ટન હરમનપ્રીત સિંહે આ પેનલ્ટી કોર્નરને ગોલમાં પરિવર્તિત કરીને મેચ 1-1થી બરાબર કરી દીધી હતી. તેણે ડ્રેગ-ફ્લિક વડે બોલને ગોલ પોસ્ટમાં મોકલ્યો. બીજા ક્વાર્ટરની શરૂઆત થતાં જ ભારતે તેના હુમલાને વધુ તીવ્ર બનાવી દીધું અને થોડી જ વારમાં હરમનપ્રીતે ફરી ગોલ કર્યો. આ વખતે પેનલ્ટી સ્પોટથી. આ ગોલ સાથે ભારતે 2-1ની સરસાઈ મેળવી હતી જે અંત સુધી જળવાઈ રહી હતી.

પાકિસ્તાને ફરી પોતાના ઘૂંટણ ટેકવ્યા

પાકિસ્તાન સામે હંમેશા ભારતનો દબદબો રહ્યો છે. ગયા વર્ષે હેંગઝોઉ એશિયન ગેમ્સમાં ભારતે પાકિસ્તાનને 10-2થી હરાવ્યું હતું. આ પહેલા ચેન્નાઈમાં એશિયન ચેમ્પિયન્સ ટ્રોફીમાં પાકિસ્તાન સામે 4-0થી જીત મેળવી હતી. જકાર્તામાં 2022 એશિયા કપમાં, યુવા ભારતીય ટીમે પાકિસ્તાનને 1-1થી ડ્રો પર રાખ્યું હતું, જ્યારે ઢાકામાં 2021 એશિયન ચેમ્પિયન્સ ટ્રોફીમાં, ભારતે પાકિસ્તાનને 4-3થી હરાવીને બ્રોન્ઝ મેડલ જીત્યો હતો. ચેન્નાઈમાં રમાયેલી છેલ્લી એશિયન ચેમ્પિયન્સ ટ્રોફી 2023ની મેચમાં ભારતે પાકિસ્તાનને 4-0થી હરાવ્યું હતું.