નવી દિલ્હીઃ ટીમ ઈન્ડિયાએ બીજી ટી-20માં આયરલેન્ડને હરાવીને 2 મેચની ટી-20 શ્રેણી જીતી લીધી છે. હાર્દિક પંડ્યાએ કેપ્ટન તરીકે તેની પ્રથમ શ્રેણી જીતી હતી. આ હાઈ સ્કોરિંગ મેચમાં ઘણા નવા રેકોર્ડ બન્યા હતા. દીપક હુડા અને સંજુ સેમસન ભારતની જીતના હીરો હતા. ભારત તરફથી બંને બેટ્સમેનોએ જોરદાર બેટિંગ કરી હતી. જ્યાં હુડ્ડાએ 57 બોલમાં 104 રનની ઇનિંગ રમીને ભારત માટે પોતાની પ્રથમ ટી20 સદી ફટકારી હતી. આ સાથે જ સંજુ સેમસને પણ 42 બોલમાં 77 રનની આક્રમક ઇનિંગ રમી હતી.
ભારત માટે સૌથી મોટી T20 ભાગીદારી
દીપક હુડા અને સંજુ સેમસને બીજી વિકેટ માટે 176 રનની રેકોર્ડ ભાગીદારી કરી હતી. ટી20 ઈન્ટરનેશનલમાં ભારત માટે આ અત્યાર સુધીની સૌથી મોટી ભાગીદારી છે. આ પહેલા આ રેકોર્ડ કેએલ રાહુલ અને રોહિત શર્માના નામે હતો. રાહુલ અને રોહિતે વર્ષ 2017માં શ્રીલંકા સામે 165 રનની ભાગીદારી નોંધાવી હતી. હુડા અને સેમસન વચ્ચેની આ ભાગીદારી T20 ક્રિકેટમાં 9મી સૌથી મોટી ભાગીદારી છે. હુડ્ડાએ પોતાની ઇનિંગમાં 9 ચોગ્ગા અને 4 છગ્ગા ફટકાર્યા હતા.
આયરલેન્ડ સામેનો બીજો સર્વોચ્ચ T20 સ્કોર
ભારતે આયરલેન્ડ સામે 225 રન બનાવ્યા હતા. આયરલેન્ડ સામે અત્યાર સુધીનો આ બીજો સૌથી મોટો T20 સ્કોર છે. આ પહેલા સ્કોટલેન્ડે આયરલેન્ડ સામે 252 રન બનાવ્યા હતા. ભારતના 225 રનના જવાબમાં આયરલેન્ડ પણ ઝડપી શરૂઆત કરી હતી અને રન ચેઝમાં ભારતને ટક્કર આપી હતી. એક સમયે મેચ ભારતના હાથમાંથી સરકી જતી હોય તેવું લાગી રહ્યું હતું. અંતે ભારતે આ મેચ 4 રનના માર્જીનથી જીતી લીધી હતી.
