IPL 2024 હરાજી હાઇલાઇટ્સ: દુબઇમાં યોજાયેલી IPL 2024 હરાજી દરમિયાન, તમામ 10 ફ્રેન્ચાઇઝીઓએ કુલ 72 ખેલાડીઓને ખરીદવા માટે કુલ રૂ. 230.45 કરોડનો ખર્ચ કર્યો હતો. આ હરાજીમાં કુલ 333 ખેલાડીઓનો સમાવેશ કરવામાં આવ્યો હતો, જેમાં ટીમ ઈન્ડિયા તરફથી રમી ચૂકેલા 14 ખેલાડીઓનો સમાવેશ થાય છે. પરંતુ આ 14 ખેલાડીઓમાંથી 6 ખેલાડીઓને કોઈ ખરીદનાર મળ્યો નથી.
ટીમ ઈન્ડિયાના આ ખેલાડીઓ વેચાયા વગરના રહ્યા
આઈપીએલ 2024ની હરાજીમાં ટીમ ઈન્ડિયાના કુલ 6 ખેલાડીઓ વેચાયા વગરના રહ્યા. આ 6 ખેલાડીઓ છે કરુણ નાયર, હનુમા વિહારી, વરુણ એરોન, સિદ્ધાર્થ કૌલ, બરિન્દર સરન અને સંદીપ વોરિયર. આ તમામ ખેલાડીઓએ તેમની મૂળ કિંમત 50 લાખ રૂપિયા રાખી હતી. તે જ સમયે, હનુમા વિહારી, વરુણ એરોન, સિદ્ધાર્થ કૌલ અને બરિન્દર સરનના નામ પણ હરાજીમાં આવ્યા ન હતા. બીજી તરફ કરુણ નાયર અને સંદીપ વારિયરને ખરીદવામાં કોઈ ટીમે રસ દાખવ્યો ન હતો.
આ ભારતીય કેપ્ડ ખેલાડીઓને ખરીદદારો મળ્યા
આ હરાજીમાં ટીમ ઈન્ડિયાના 14માંથી 8 ખેલાડીઓને ખરીદદાર મળ્યા હતા. જેમાં મનીષ પાંડે, હર્ષલ પટેલ, શાર્દુલ ઠાકુર, કેએસ ભરત, શિવમ માવી, ચેતન સાકરિયા, જયદેવ ઉનડકટ અને ઉમેશ યાદવના નામ સામેલ છે. હરાજીમાં ઉમેશ યાદવ, શાર્દુલ ઠાકુર અને હર્ષલ પટેલની બેઝ પ્રાઈસ 2 કરોડ રૂપિયા હતી, બાકીના તમામ ખેલાડીઓ 50 લાખ રૂપિયાની બેઝ પ્રાઈસ સાથે હરાજીમાં આવ્યા હતા.
મિચેલ સ્ટાર્ક સૌથી મોંઘો ખેલાડી હતો
ઓસ્ટ્રેલિયાનો ફાસ્ટ બોલર મિચેલ સ્ટાર્ક IPLના ઈતિહાસનો સૌથી મોંઘો ખેલાડી બન્યો છે. સ્ટાર્કને કોલકાતા નાઈટ રાઈડર્સે 24.75 કરોડ રૂપિયામાં ખરીદ્યો હતો. તે જ સમયે, પેટ કમિન્સ પર પણ ઘણા પૈસાનો વરસાદ થયો હતો. કમિન્સને સનરાઇઝર્સ હૈદરાબાદે 20.50 કરોડ રૂપિયામાં ખરીદ્યો હતો. હરાજીમાં હર્ષલ પટેલ સૌથી મોંઘો ભારતીય ખેલાડી હતો. તેને પંજાબ કિંગ્સે 11.75 કરોડમાં ખરીદ્યો હતો.
