ભારત અને ઓસ્ટ્રેલિયા વચ્ચે આવતીકાલે એટલે કે શુક્રવારથી એડિલેડમાં બીજી ટેસ્ટ રમાશે. આ ડે-નાઈટ ટેસ્ટ મેચ હશે. આ મેચ ભારતીય સમય અનુસાર સવારે 9.30 વાગ્યાથી રમાશે. પાંચ મેચની ટેસ્ટ શ્રેણીમાં ભારત ઓસ્ટ્રેલિયા પર 1-0થી આગળ છે. પર્થમાં રમાયેલી પ્રથમ ટેસ્ટ મેચમાં ભારતે ઓસ્ટ્રેલિયાને 295 રનથી હરાવ્યું હતું. પ્રથમ ટેસ્ટમાં જીત બાદ ટીમ ઈન્ડિયાનું મનોબળ ઉંચુ છે. હવે ટીમ ઈન્ડિયાની નજર એડિલેડમાં રમાનાર ડે-નાઈટ ટેસ્ટ મેચ જીતવા પર છે.
ઓસ્ટ્રેલિયાએ તેની ખતરનાક પ્લેઈંગ ઈલેવનની જાહેરાત કરી છે
ઓસ્ટ્રેલિયાએ એડિલેડમાં યોજાનારી ડે-નાઈટ ટેસ્ટ મેચ માટે તેની પ્લેઈંગ ઈલેવનની જાહેરાત કરી દીધી છે. ઓસ્ટ્રેલિયાના કેપ્ટન પેટ કમિન્સે ભારત સામેની બીજી ટેસ્ટ માટે પ્લેઈંગ ઈલેવનની જાહેરાત કરી છે. ટીમમાં એક માત્ર ફેરફાર એ હતો કે ફાસ્ટ બોલર જોશ હેઝલવુડની જગ્યાએ સ્કોટ બોલેન્ડનો સમાવેશ કરવામાં આવ્યો હતો. એડિલેડ ઓવલ ખાતે ભારત સામે ગુલાબી બોલની ટેસ્ટ મેચ માટે પ્લેઈંગ ઈલેવનમાં અન્ય કોઈ ફેરફાર કરવામાં આવ્યા નથી.
જોશ હેઝલવુડ સાઇડ સ્ટ્રેન સાથે આઉટ
ઓસ્ટ્રેલિયાનો ઘાતક ઝડપી બોલર જોશ હેઝલવુડ સાઇડ સ્ટ્રેનને કારણે બીજી ટેસ્ટમાંથી બહાર થઇ ગયો છે. તે જ સમયે, ઓસ્ટ્રેલિયાના ઓલરાઉન્ડર મિચેલ માર્શે એડિલેડમાં યોજાનારી ડે-નાઈટ ટેસ્ટ મેચ માટે પ્લેઈંગ ઈલેવનમાં પોતાનું સ્થાન જાળવી રાખ્યું છે. સ્કોટ બોલેન્ડ બીજી ટેસ્ટ પહેલા જ ઓસ્ટ્રેલિયાની 13 સભ્યોની ટીમનો ભાગ હતો. આ ઝડપી બોલર 2023ની એશિઝ બાદ ટેસ્ટ ટીમમાં વાપસી કરી રહ્યો છે. પર્થમાં ભારત સામેની પ્રથમ ટેસ્ટમાં હાર બાદ ઓસ્ટ્રેલિયન કેમ્પમાં કથિત મતભેદોની કેટલીક અફવાઓ હતી. ઘણા લોકોનું અનુમાન હતું કે જોશ હેઝલવુડ બીજી ટેસ્ટમાં ન રમવાનું કારણ પ્રથમ ટેસ્ટમાં 295 રનની હાર બાદ પ્રેસ-કોન્ફરન્સમાં તેમની ટિપ્પણીઓ હતી.
ઓસ્ટ્રેલિયન ખેલાડીઓ વચ્ચે મતભેદ હોવાના દાવાઓને ફગાવી દીધા
કેપ્ટન કમિન્સ સહિત ઘણા ઓસ્ટ્રેલિયન ખેલાડીઓએ મતભેદોના આવા દાવાઓને ફગાવી દીધા હતા. 2022માં વેસ્ટ ઈન્ડિઝ સામેની મેચ બાદ એડિલેડમાં બોલેન્ડની આ બીજી ગુલાબી બોલ ટેસ્ટ હશે. બોલેન્ડે તે મેચમાં ત્રણ વિકેટ ઝડપી હતી. દરમિયાન, ગુલાબી બોલ ટેસ્ટ માટે ભારતની પ્લેઈંગ ઈલેવનને લઈને સસ્પેન્સ છે. સુકાની રોહિત શર્માની ટીમમાં વાપસી સાથે, શુભમન ગિલ અંગૂઠાની ઈજામાંથી સ્વસ્થ થઈ ગયો છે, ટીમમાં કેટલાક ફેરફારોની અપેક્ષા છે. રોહિતની વાપસી સાથે બીજી ટેસ્ટ માટે ભારતના ઓપનિંગ સ્લોટ અંગે ઉત્સુકતા વધી ગઈ છે.
એડિલેડ ટેસ્ટ માટે ઓસ્ટ્રેલિયાની પ્લેઈંગ ઈલેવન
ઉસ્માન ખ્વાજા, નાથન મેકસ્વીની, માર્નસ લેબુશેન, સ્ટીવ સ્મિથ, ટ્રેવિસ હેડ, મિશેલ માર્શ, એલેક્સ કેરી (વિકેટ-કીપર), પેટ કમિન્સ (કેપ્ટન), મિચેલ સ્ટાર્ક, નાથન લિયોન અને સ્કોટ બોલેન્ડ.
