નવી દિલ્હીઃ ભારતીય ટીમના દિગ્ગજ બેટ્સમેન કેએલ રાહુલ ટૂંક સમયમાં લગ્નના બંધનમાં બંધાઈ શકે છે. આથિયા શેટ્ટી અને કેએલ રાહુલ લાંબા સમયથી રિલેશનશિપમાં છે. હાલમાં જ કેએલ રાહુલની સર્જરી બાદ અથિયા જર્મનીથી પરત ફર્યા છે. રાહુલ પીઠની સર્જરી માટે જર્મની ગયો હતો અને તેના કારણે તે પહેલા દક્ષિણ આફ્રિકા પછી ઈંગ્લેન્ડ શ્રેણીમાંથી બહાર થઈ ગયો હતો. ઓગસ્ટમાં શરૂ થઈ રહેલા એશિયા કપ T20માં પણ તેની એન્ટ્રી થવાની શક્યતા ઓછી છે. ટીમ મેનેજમેન્ટ પણ તેની વાપસી અંગે ઉતાવળ કરી રહ્યું નથી, કારણ કે આ વર્ષે ઑક્ટોબર-નવેમ્બરમાં ઑસ્ટ્રેલિયામાં T20 વર્લ્ડ કપ યોજાવાનો છે. આવી સ્થિતિમાં, ત્યાં સુધીમાં તેઓ સંપૂર્ણ રીતે ફિટ થઈ શકે છે.
ઈન્ડિયા ટુડેના સમાચાર મુજબ કેએલ રાહુલ અને આથિયા શેટ્ટી આગામી ત્રણ મહિનામાં મુંબઈમાં લગ્ન કરી શકે છે. મળતી માહિતી મુજબ, બંને પરિવારો માટે એક ભવ્ય કાર્યક્રમ હશે અને આથિયા પોતે તૈયારીઓ જોઈ રહી છે. એક સૂત્રએ જણાવ્યું કે હાલમાં જ બંને તેમના પરિવારના સભ્યો સાથે નવું ઘર જોવા આવ્યા હતા. હાલમાં આ મકાનમાં નવીનીકરણનું કામ તેજ ગતિએ ચાલી રહ્યું છે. અહીં બંને રહેશે. નોંધનીય છે કે IPL 2022માં રાહુલે બેટથી શાનદાર પ્રદર્શન કરતા 600થી વધુ રન બનાવ્યા હતા. તેની કપ્તાનીમાં લખનઉ સુપર જાયન્ટ્સની ટીમ પણ પ્લેઓફમાં પહોંચી હતી. આથિયા સુનીલ શેટ્ટીની દીકરી છે.
ફિલ્મી કરિયર કંઈ ખાસ રહી નથી
આથિયા શેટ્ટીનું બોલિવૂડ કરિયર કંઈ ખાસ નહોતું. તેણે સલમાન ખાનના પ્રોડક્શન હાઉસના બેનર હેઠળ બનેલી ફિલ્મ હીરોમાં પોતાના અભિનયની શરૂઆત કરી હતી. આ ફિલ્મ બોક્સ ઓફિસ પર કંઈ ખાસ કમાલ ના કરી શકી. આ પછી અથિયા અર્જુન કપૂરની સાથે ફિલ્મ મુબારકાંમાં જોવા મળી હતી. આ ફિલ્મ પણ એવરેજ હતી.
ઑક્ટોબર-નવેમ્બરમાં ઑસ્ટ્રેલિયામાં ટી-20 વર્લ્ડ કપની મેચો યોજાવાની છે. કેએલ રાહુલ ત્યાં સુધીમાં ફિટ થઈ શકે છે. તે ટીમ ઈન્ડિયા માટે ત્રણેય ફોર્મેટમાં સતત સારું પ્રદર્શન કરી રહ્યો છે. T20માં સદી ફટકારનાર 5 ભારતીય ખેલાડીઓની યાદીમાં પણ તેનો સમાવેશ થાય છે.
