ટીમ ઈન્ડિયાના કેપ્ટન રોહિત શર્મા લેસ્ટરમાં ટીમ ઈન્ડિયા સાથે જોડાઈ ગયા છે. પ્રેક્ટિસ મેચ પહેલા સખત તાલીમ દરમિયાન રોહિત પણ ટીમ ઈન્ડિયા સાથે દેખાયો અને બાકીના ખેલાડીઓ સાથે વાતચીત પણ કરી.
ટીમ ઈન્ડિયા 1 જુલાઈથી ઈંગ્લેન્ડ સામે એકમાત્ર ટેસ્ટ મેચ રમવાની છે. આ પહેલા ભારતીય ટીમે 24 જૂનથી લેસ્ટરશાયર સામે ચાર દિવસીય પ્રેક્ટિસ મેચ રમવાની છે. પ્રેક્ટિસ મેચ પહેલા ભારતીય ટેસ્ટ ટીમ લેસ્ટર પહોંચી ગઈ છે અને સખત પ્રેક્ટિસ શરૂ કરી દીધી છે. વિરાટ કોહલી સહિત મોહમ્મદ શમી, જસપ્રિત બુમરાહ જેવા ખેલાડીઓ પહેલા જ ઈંગ્લેન્ડ પહોંચી ગયા હતા,
રોહિત એક દિવસ પછી ઈંગ્લેન્ડ પ્રવાસ માટે રવાના થઈ ગયા હતા. સાઉથ આફ્રિકા વિરૂદ્ધ T20 ઈન્ટરનેશનલ ટીમમાં સામેલ ઋષભ પંત, શ્રેયસ અય્યર અને રાહુલ દ્રવિડ પણ ઈંગ્લેન્ડ પહોંચી ગયા છે.
2021માં ભારત અને ઈંગ્લેન્ડ વચ્ચે પાંચ મેચની ટેસ્ટ શ્રેણી યોજાવાની હતી, જેમાં ભારત ચાર ટેસ્ટ મેચો બાદ 2-1થી આગળ છે. શ્રેણીની છેલ્લી ટેસ્ટ પહેલા, ભારતીય કેમ્પમાં કોવિડ -19 કેસની વધતી સંખ્યાને કારણે તેને રદ કરવી પડી હતી. શ્રેણીની નિર્ણાયક ટેસ્ટ મેચ હવે 1 જુલાઈથી રમાશે. બીસીસીઆઈએ લેસ્ટરથી ભારતીય ટીમની ટ્રેનિંગની કેટલીક તસવીરો શેર કરી છે.
