ઓમાનના સુલતાન હૈથમ બિન તારિક અલ સૈદ 16 ડિસેમ્બરે ભારતની સરકારી મુલાકાતે આવશે. આ તેમની પ્રથમ ભારત મુલાકાત હશે. ઇઝરાયેલ-હમાસ સંઘર્ષ ફાટી નીકળ્યા બાદ ગલ્ફ ક્ષેત્રના ટોચના નેતાની આ પ્રથમ મુલાકાત હશે.
રાજદ્વારી સંબંધો સુધરશે
રવિવારે આ મુલાકાતની જાહેરાત કરતા વિદેશ મંત્રાલયે કહ્યું કે સુલતાન હૈથમ બિન તારિકની મુલાકાત ભારત અને ઓમાન વચ્ચેના રાજદ્વારી સંબંધોમાં એક મહત્વપૂર્ણ સીમાચિહ્નરૂપ છે. વિદેશ મંત્રાલયે જણાવ્યું કે ઓમાનના સુલતાન રાષ્ટ્રપતિ દ્રૌપદી મુર્મુના આમંત્રણ પર ભારતની મુલાકાતે છે અને તેમની સાથે વરિષ્ઠ મંત્રીઓ અને અધિકારીઓ સહિત ઉચ્ચ સ્તરીય પ્રતિનિધિમંડળ પણ આવશે.
ભવિષ્યમાં બંને દેશો વચ્ચે સહયોગ વધશે
આ મુલાકાત પ્રાદેશિક સ્થિરતા, પ્રગતિ અને સમૃદ્ધિ માટે ભારત અને ઓમાન વચ્ચે ભાવિ સહયોગના માર્ગો શોધવાની તક હશે. વિદેશ મંત્રાલયે કહ્યું કે મુર્મુ અને વડાપ્રધાન નરેન્દ્ર મોદી 16 ડિસેમ્બરે રાષ્ટ્રપતિ ભવનમાં સુલતાન હૈથમ બિન તારિકનું ઔપચારિક સ્વાગત કરશે.
પીએમ મોદી સાથે દ્વિપક્ષીય વાતચીત કરશે
એક નિવેદનમાં કહેવામાં આવ્યું છે કે તેઓ વડાપ્રધાન સાથે દ્વિપક્ષીય ચર્ચા કરશે. તેમાં કહેવામાં આવ્યું છે કે ભારત અને ઓમાન વચ્ચે મૈત્રી અને સહકારનો લાંબો ઈતિહાસ છે, જે પરસ્પર વિશ્વાસ અને સન્માનના પાયા પર બનેલો છે અને સદીઓથી લોકો વચ્ચેના મજબૂત સંબંધો છે. ભારત અને ઓમાનની સલ્તનત વ્યૂહાત્મક ભાગીદારો છે અને બંને દેશો વચ્ચે દ્વિપક્ષીય વેપાર અને રોકાણ સંબંધો વર્ષોથી વિકસતા રહ્યા છે.
