દેશમાં ઇલેક્ટ્રિક વાહન સેગમેન્ટમાં જબરદસ્ત વૃદ્ધિ જોવા મળી
2030 સુધીમાં ભારતમાં દર વર્ષે લગભગ 1 કરોડ ઇલેક્ટ્રિક વાહનોનું વેચાણ થવાની સંભાવના
ભારતમાં ઇલેક્ટ્રિક વાહનોની માંગ ઝડપથી વધતી જોવા મળી રહી છે. છેલ્લા કેટલાક વર્ષોમાં દેશમાં ઇલેક્ટ્રિક વાહન સેગમેન્ટમાં જબરદસ્ત વૃદ્ધિ જોવા મળી છે અને ઉદ્યોગના નિષ્ણાતોથી લઈને સરકાર સુધી દરેકને વિશ્વાસ છે કે આવનારો સમય વધુ સારો હશે તેવું મનાય છે. કેન્દ્રીય માર્ગ પરિવહન અને ધોરીમાર્ગ મંત્રી નીતિન ગડકરીએ દિલ્હીમાં ચાલી રહેલા EV EXPO 2023માં જણાવ્યું હતું કે 2030 સુધીમાં ભારતમાં દર વર્ષે લગભગ 1 કરોડ ઇલેક્ટ્રિક વાહનોનું વેચાણ થવાની સંભાવના છે. અને તેનાથી લગભગ 5 કરોડ નોકરીઓનું સર્જન થશે.
નીતિન ગડકરીએ કહ્યું હતું કે, ‘આજે ભારત વિશ્વમાં 30 ટકા અશ્મિભૂત ઇંધણ વાપરે છે. અને આપણી મોટાભાગની નિર્ભરતા આયાત પર છે. અમે માત્ર પેટ્રોલ, ડીઝલ અને ક્રૂડ ઓઇલની આયાત પર અંદાજે રૂ. 16 લાખ કરોડનો ખર્ચ કરીએ છીએ જે દેશના જીડીપીના આશરે 3 ટકા રહી છે.’ તે દુર્ભાગ્યપૂર્ણ છે કે દેશના પરિવહન ક્ષેત્રની 85 ટકા જરૂરિયાતો માત્ર આયાતી અશ્મિભૂત ઇંધણ દ્વારા જ પૂરી થાય છે.‘અમેરિકા અને ચીન બાદ ભારત વિશ્વનું ત્રીજું સૌથી મોટું ઓટોમોટિવ માર્કેટ સાબિત થઇ શકે છે.
હાલમાં ઓટો ઉદ્યોગ લગભગ 12.5 લાખ કરોડ રૂપિયાનું છે દર વર્ષે વાહનોની સંખ્યામાં 10 ટકાનો વધારો જોવા મળી રહ્યો છે. એટલું જ નહીં. ‘ભારત દેશમાં CO2 ઉત્સર્જનના 40 ટકા માટે એકલું ઓટો ક્ષેત્ર જવાબદાર છે. ડીઝલ એન્જિન પર ચાલતા વાહનો પ્રદૂષણનું મુખ્ય કારણ છે અને પર્યાવરણ માટે અત્યંત હાનિકારક છે.’
તેમણે કહ્યું હતું, ‘અમે પરિવહન ક્ષેત્રને ડીકાર્બોનાઇઝ કરવા માટે મિશન મોડમાં કામ કરી રહ્યા છીએ આ પ્રયાસમાં ઓછા ઉત્સર્જનવાળા પરિવહન જેમ કે ઇલેક્ટ્રિક વાહનો મહત્વપૂર્ણ ભૂમિકા ભજવી રહ્યા છે. ઇલેક્ટ્રિક વાહનો પરિવહન માટે સૌથી યોગ્ય છે સુરક્ષિત અને સ્વચ્છ છે. જો આપણે નિયમિત વાહનોને બદલે સંપૂર્ણપણે ઇલેક્ટ્રિક વાહનો પર સ્વિચ કરો, CO2 ઉત્સર્જન 2030 સુધીમાં 1 ગીગા ટન સુધી ઘટાડી શકાય છે.’ ઈલેક્ટ્રિક વાહનોની માંગ અને સેક્ટરમાં રોજગાર અંગે ગડકરીએ કહ્યું હતું કે, ‘દેશમાં ઈલેક્ટ્રિક વાહનોની માંગ ઝડપથી વધી રહી છે અને વાહનના ડેટા અનુસાર, ભારતમાં અત્યાર સુધીમાં 34.54 લાખ ઈલેક્ટ્રિક વાહનો નોંધાયા છે. જે ઝડપે દેશમાં ઈલેક્ટ્રિક મોબિલિટી વધી રહી છે અને એવો અંદાજ છે કે વર્ષ 2030 સુધીમાં દેશમાં દર વર્ષે લગભગ 1 કરોડ ઈવીનું વેચાણ થશે અને તેનાથી લગભગ 5 કરોડ નોકરીઓનું સર્જન થશે.
