આમ આદમી પાર્ટી (AAP)ના સંયોજક અને દિલ્હીના પૂર્વ મુખ્યમંત્રી અરવિંદ કેજરીવાલે રાષ્ટ્રીય સ્વયંસેવક સંઘ (RSS)ના વડાને પત્ર લખ્યો છે. આ પત્રમાં કેજરીવાલે પીએમ મોદીની ઉંમર અને ‘તપાસ એજન્સીઓના દુરુપયોગ’નો મુદ્દો ઉઠાવ્યો છે. અરવિંદ કેજરીવાલે આરએસએસના વડાને લખેલા પત્રમાં કહ્યું કે, “હું આ પત્ર કોઈ રાજકીય પક્ષના નેતા તરીકે નથી લખી રહ્યો, પરંતુ આ દેશના એક સામાન્ય નાગરિક તરીકે લખી રહ્યો છું. હું આજે દેશની સ્થિતિને લઈને ખૂબ જ ચિંતિત છું. ભાજપની કેન્દ્ર સરકાર દેશને કઈ દિશામાં લઈ જઈ રહી છે અને તેની રાજનીતિ સમગ્ર દેશ માટે નુકસાનકારક છે.
તેમણે વધુમાં કહ્યું કે જો આવું ચાલતું રહેશે તો આપણું લોકતંત્ર ખતમ થઈ જશે, આપણો દેશ ખતમ થઈ જશે. પાર્ટીઓ આવશે અને જશે, ચૂંટણી આવશે અને જશે, નેતાઓ આવશે અને જશે, પરંતુ ભારત હંમેશા દેશ રહેશે. આપણા સૌની જવાબદારી છે કે આ દેશનો ત્રિરંગો હંમેશા ગર્વથી આકાશમાં લહેરાતો રહે. આ સંદર્ભમાં, જનતાના મનમાં કેટલાક પ્રશ્નો છે, જે હું તમારી સમક્ષ મૂકું છું. મારો હેતુ માત્ર ભારતીય લોકશાહીને બચાવવા અને મજબૂત કરવાનો છે.
કેજરીવાલે પત્રમાં આ પાંચ પ્રશ્નો લખ્યા છે
- અન્ય પક્ષોના નેતાઓને તોડવામાં આવી રહ્યા છે, તેમના પક્ષોને તોડવામાં આવી રહ્યા છે અને વિવિધ પ્રકારની લાલચ આપીને અથવા ED-CBIની ધમકીઓ આપીને દેશભરમાં અન્ય પક્ષોની સરકારો તોડી નાખવામાં આવી રહી છે. શું આ રીતે ચૂંટાયેલી સરકારોને પછાડવી એ દેશ અને દેશની લોકશાહી માટે યોગ્ય છે? કોઈપણ અપ્રમાણિક રીતે સત્તા મેળવવી, શું આ તમને સ્વીકાર્ય છે કે RSSને?
- વડાપ્રધાન નરેન્દ્ર મોદી અને કેન્દ્રીય મંત્રી અમિત શાહે ખુદ દેશના કેટલાક નેતાઓને જાહેર મંચ પર ભ્રષ્ટ કહ્યા અને થોડા દિવસો પછી તેમને ભારતીય જનતા પાર્ટીમાં સામેલ કર્યા. ઉદાહરણ તરીકે, 28 જૂન, 2023 ના રોજ, મોદીએ એક જાહેર ભાષણમાં એક પાર્ટી અને તેના એક નેતા પર 70 હજાર કરોડ રૂપિયાના કૌભાંડનો આરોપ લગાવ્યો. થોડા દિવસો પછી એ પક્ષ તૂટી ગયો અને એ જ નેતાની સાથે સરકાર રચાઈ અને એ જ નેતા, જે ગઈકાલ સુધી ભ્રષ્ટ કહેવાતા હતા, નાયબ મુખ્ય પ્રધાન બનાવવામાં આવ્યા. આવા અનેક કિસ્સાઓ છે જ્યારે અન્ય પક્ષોના ભ્રષ્ટ નેતાઓને ભાજપમાં સામેલ કરવામાં આવ્યા હતા. શું તમે કે આરએસએસના કાર્યકરોએ આવી ભાજપની કલ્પના કરી હતી? આ બધું જોયા પછી તમને દુઃખ નથી થતું?
- ભાજપ એવો પક્ષ છે જેનો જન્મ RSSના ગર્ભમાંથી થયો છે. ભાજપ ભ્રમિત થઈ જાય તો તેને સાચા માર્ગ પર લાવવાની જવાબદારી આરએસએસની છે. શું તમે ક્યારેય વડાપ્રધાનને આ બધા ખોટા કામો કરતા રોક્યા છે?
- જેપી નડ્ડાજીએ લોકસભા ચૂંટણી દરમિયાન કહ્યું હતું કે ભાજપને હવે આરએસએસની જરૂર નથી. એક રીતે આરએસએસ ભાજપની માતા છે. શું દીકરો એટલો મોટો થઈ ગયો છે કે તે માતાને આંખો બતાવવા લાગ્યો છે? મને ખબર પડી છે કે નડ્ડા જીના આ નિવેદનથી દરેક RSS કાર્યકર્તાને ઘણું દુઃખ થયું છે. દેશ જાણવા માંગે છે કે તેમના નિવેદનથી તમારા દિલને શું થયું?
- તમે બધાએ મળીને એક કાયદો બનાવ્યો કે ભાજપના નેતાઓ 75 વર્ષની ઉંમર પછી નિવૃત્ત થઈ જશે. આ કાયદાનો બહોળો પ્રચાર થયો અને આ કાયદા હેઠળ અડવાણીજી અને મુરલી મનોહર જોશીજી જેવા ભાજપના વરિષ્ઠ નેતાઓ નિવૃત્ત થયા. છેલ્લા 10 વર્ષોમાં, આ કાયદા હેઠળ બીજેપીના બીજા ઘણા નેતાઓ નિવૃત્ત થયા, જેમ કે ખંડુરી જી, શાંતા કુમાર જી, સુમિત્રા મહાજન જી વગેરે. હવે અમિત શાહ જી કહે છે કે આ કાયદો મોદીજી પર લાગુ નહીં થાય. શું તમે સંમત છો કે જે કાયદા હેઠળ અડવાણીજી નિવૃત્ત થયા હતા તે કાયદો હવે મોદીજી પર લાગુ થશે નહીં? શું કાયદો દરેક માટે સમાન ન હોવો જોઈએ?
