યુપીના અલીગઢમાં બુધવારે રાત્રે એક ભયાનક માર્ગ અકસ્માત થયો હતો. જેમાં 5 લોકોના મોત થયા હતા, જ્યારે 15 લોકો ઘાયલ થયા હતા. મળતી માહિતી મુજબ, યમુના એક્સપ્રેસ વે પર મુસાફરોને લઈ જતી બસ એક ટ્રક સાથે અથડાઈ હતી. ટ્રક સાથે અથડાતા બસના ટુકડા થઈ ગયા હતા. મૃતકોમાં એક પાંચ મહિનાનું બાળક, એક મહિલા અને 3 પુરૂષોનો સમાવેશ થાય છે.
પોલીસે જણાવ્યું કે બસ દિલ્હીથી આઝમગઢ જવા રવાના થઈ હતી. અકસ્માત બાદ મૃતકોના મૃતદેહ બસની અંદર ફસાઈ ગયા હતા. આ પછી પોલીસે ઘટનાસ્થળે પહોંચીને મૃતદેહોને બહાર કાઢ્યા હતા. જે લોકો બસમાં બચી ગયા હતા તેઓ બારીના કાચ તોડીને બહાર આવ્યા હતા. પોલીસ મૃતકો અને ઘાયલોને જેવરની કૈલાશ હોસ્પિટલમાં લઈ ગઈ હતી. અકસ્માતમાં માર્યા ગયેલા પાંચ લોકોમાંથી ત્રણની ઓળખ થઈ ગઈ છે, જ્યારે બેની ઓળખ થવાની બાકી છે.
રસ્તા પર પડેલા ઇજાગ્રસ્ત બાળકો અને મહિલાઓ
ટપ્પલ પોલીસ સ્ટેશનના ઈન્સ્પેક્ટર શિશુપાલ શર્માએ જણાવ્યું કે, આ દુર્ઘટના યમુના એક્સપ્રેસ વે પર ટપ્પલ પાસે રાત્રે લગભગ 1 વાગ્યે થઈ હતી. બસ દિલ્હીથી આઝમગઢ જઈ રહી હતી, જ્યારે ટ્રક દિલ્હીથી આગ્રા જઈ રહી હતી. આ દરમિયાન બસની સ્પીડ વધુ હોવાને કારણે તે કાબૂ બહાર નીકળી ગઈ હતી અને બીયરની ખાલી બોટલો ભરેલી ટ્રક સાથે અથડાઈ હતી. અકસ્માત એટલો ગંભીર હતો કે બસ કંડક્ટરની બાજુથી સંપૂર્ણ રીતે ક્ષતિગ્રસ્ત થઈ ગઈ હતી.
અકસ્માત બાદ હાઈવે પર લાંબો જામ થઈ ગયો હતો, પરંતુ પોલીસે તાત્કાલિક ક્રેઈન બોલાવી નુકસાન પામેલા વાહનોને રોડ પરથી હટાવ્યા હતા. અકસ્માત એટલો ભયાનક હતો કે અકસ્માત બાદ ઘાયલ બાળકો અને મહિલાઓ રોડ પર પડી રહી હતી. આ દ્રશ્ય જોઈને ત્યાંથી પસાર થતા લોકોના હૃદય હચમચી ઉઠ્યા હતા.
