Lok Sabha Election : લોકસભાની ચૂંટણીમાં આ વખતે ગુજરાતમાં ભાજપને ભારે પડી શકે તેવા કોંગ્રેસના ઉમેદવારોનું નામ લેવામાં આવે તો તેમાં ગેનીબેન ઠાકોર ટોચ પર આવે છે. વાવના ધારાસભ્ય ગેનીબેન ઠાકોર અત્યારે બનાસકાંઠામાં કોંગ્રેસના ઉમેદવાર છે અને તેમના ચૂંટણીપ્રચાર પરથી લાગે છે કે તેઓ ખાસ્સી લોકપ્રિયતા ધરાવે છે. તેની સામે ભાજપના રેખાબેન ચૌધરી ચૂંટણી લડી રહ્યા છે. આજે મતદાનના દિવસે બનાસકાંઠામાં સવારથી જ જોરદાર વોટિંગ થયું છે અને બપોરના એક વાગ્યા સુધીમાં બનાસકાંઠામાં મતદાનની ટકાવારી 46 ટકા સુધી પહોંચી ગઈ છે.
અમદાવાદ અને ગાંધીનગર જેવા શહેરી વિસ્તારોમાં વોટિંગનું પ્રમાણ માંડ 33થી 34 ટકાની આસપાસ હતું ત્યારે બનાસકાંઠામાં એક વાગ્યા સુધીમાં લગભગ 46 ટકા વોટિંગ થઈ ગયું હતું. આ આંકડા ભાજપ અને કોંગ્રેસ બંને માટે ચોંકાવનારા છે કારણ કે બીજા કોઈ પણ મતક્ષેત્રમાં આટલું ભારે મતદાન નથી થયું.
બપોરે એક વાગ્યા સુધીમાં 40 ટકાથી ઉપરનો વોટિંગનો આંકડો આણંદ, છોટા ઉદેપુર, બારડોલી, ભરુચ અને સાબરકાંઠામાં જોવા મળ્યો છે. જ્યારે પોરબંદરમાં મતદારોને વોટિંગમાં ઓછો રસ હોય એવું લાગે છે. પોરબંદરમાં 30 ટકાની આસપાસ વોટિંગ થયું હતું. બનાસકાંઠાના સંસદીય ક્ષેત્રમાં સાત વિધાનસભાનો સમાવેશ થાય છે. જેમાં પાલનપુર, ડીસા, ધાનેરા, થરાદ, દિયોદર, વાવ અને દાંતા વિધાનસભા આવે છે. અહીં કુલ 19 લાખ 61 હજાર 924 મતદારો છે.
બનાસકાંઠામાં આ વખતે ચૌધરી અને ઠાકોર વચ્ચે સીધો જંગ છે. તેમાં કોંગ્રેસના ગેની બેન એક મજબૂત સ્થાનિક નેતા છે અને પાયાના સ્તરે જોરદાર સમર્થન ધરાવે છે. તેની સામે રેખા બેન ચૌધરી બનાસ ડેરીના સ્થાપક ગલબાકાકાના દિકરી છે અને પ્રોફેસર છે. રાજકારણના ક્ષેત્રમાં તેઓ બિનઅનુભવી ગણાય છે.
ગેનીબેન ઠાકોર ધોરણ 12 ભણ્યા છે અને 2017માં તેમણે વાવમાં ભાજપના શંકર ચૌધરીને હરાવ્યા હતા જે તેમની બહુ મહત્ત્વની જીત હતી. વાવની બેઠક પર તેમણે શંકર ચૌધરીને 6655 મતની સરસાઈ સાથે હરાવ્યા હતા અને પોતાની લોકપ્રિયતા સાબિત કરી હતી. તેમની છાપ એક બેબાક નેતા તરીકેની છે તેથી તેઓ જ્યારે પોતાનો મત વ્યક્ત કરે ત્યારે કોઈની સાડાબારી રાખતા નથી. તેમના કેટલાક નિવેદન વિવાદાસ્પદ પણ બન્યા છે. 2019માં તેમણે સમાજના એક કાર્યક્રમમાં કહ્યું કે કુંવારી છોકરીઓને મોબાઈલ ફોન વાપરવા દેવો ન જોઈએ.
ગેનીબેને તે સમયે એવું કહ્યું હતું કે, “છોકરીઓ માટે મોબાઈલ પર પ્રતિબંધ મૂકવાના પગલામાં કંઈપણ ખોટું નથી. છોકરીઓએ સોશિયલ મિડિયાથી દૂર રહેવું જોઈએ અને ભણવામાં વધુ સમય આપવો જોઈએ”. તેનાથી અગાઉ 2018માં પણ એક નિવેદનમાં તેમણે કહ્યું હતું કે બળાત્કારીઓને પોલીસને સોંપવાના બદલે તેમને સળગાવી દેવા જોઈએ. જોકે, તેમણે પછી એવું કહ્યું કે તેઓ મહિલાઓનો ગુસ્સો શાંત કરવા માટે આવું બોલ્યા હતા.
એક સમયે ગની બેન ઠાકોરે શરાબના વિક્રેતાઓ સામે લાલ આંખ કરી હતી અને ધારાસભ્ય તરીકે કેટલીક જગ્યાએ જનતા રેડ પણ પાડી હતી. એક વખત તેમણે હોળી પછીના દિવસે, એટલે કે ધૂળેટીના દિવસે દારુ ભરેલી ગાડી પકડી હતી અને સ્થળ પર જ શરાબનો નાશ કર્યો હતો. તે સમયે વહીવટીતંત્ર અને કોંગ્રેસના ધારાસભ્ય આમને સામને આવી ગયા હતા. ધારાસભ્યની જનતા રેડ બાદ પોલીસે પણ લગભગ દોઢસોથી વધુ જગ્યાએ રેડ પાડીને શરાબ પકડવો પડ્યો હતો. ગેની બેન ઠાકોર અગાઉ એવું પણ બોલી ગયા છે કે કોંગ્રેસને જીતાડવા માટે ભગતસિંહ બનવું પડે કે ઝાંસીની રાણી બનવું પડે તો પણ બનીશું.
ભાજપે આ વખતે બનાસકાંઠામાં નવા ચહેરાને તક આપી છે. બનાસ ડેરીના સ્થાપક ગલબાભાઈના પૌત્રી અને ડો રેખા ચૌધરીને નરેન્દ્ર મોદીના નામનો ફાયદો થઈ શકે છે. ભાજપ બૂથ મેનેજમેન્ટ કરવામાં બધા કરતા આગળ છે અને તેના કાર્યકરોનું પ્લાનિંગ સજ્જડ હોય છે. તેથી તે પોતાના વોટરને મતદાનમથક સુધી લઈ જઈ શકે છે. રેખાબેન ચૌધરી છેલ્લા 20 વર્ષથી એન્જિનિયરિંગ કોલેજમાં પ્રોફેસર છે અને તેઓ એક શિક્ષિત ઉમેદવાર યુવા ચહેરા તરીકે મેદાનમાં ઉતર્યા છે.
ગુજરાતમાં આ વખતે કોંગ્રેસની સ્થિતિ ઘણી નબળી જણાય છે અને સુરતમાં તો કોંગ્રેસના ઉમેદવાર ચૂંટણી પણ લડી શક્યા નથી. ત્યારે બનાસકાંઠા જેવા વિસ્તારમાં એક લડાયક નેતાની છાપ ધરાવતા ગેની બેન ઠાકોરને બનાસકાંઠામાં થયેલું ભારે મતદાન કેટલું ફાયદાકારક થાય છે તે રિઝલ્ટના દિવસે ખબર પડી જશે.
