Pok Protest : પાકિસ્તાન અધિકૃત કાશ્મીર (POK)માં અત્યારે કંઈ સારું નથી ચાલી રહ્યું. વીજળીના બિલ પર લાદવામાં આવેલા ‘અન્યાયી’ ટેક્સના વિરોધમાં લોકો રસ્તા પર ઉતરી આવ્યા છે. કાશ્મીરીઓએ શાહબાઝ સરકાર વિરુદ્ધ સૂત્રોચ્ચાર કર્યા અને ગુસ્સામાં પાકિસ્તાની સેના પર પથ્થરમારો કર્યો. લોકોના અનિયંત્રિત ગુસ્સાને શાંત કરવા પોલીસે હવામાં ગોળીબાર કરવો પડ્યો હતો, પરંતુ તેમ છતાં સ્થિતિ સામાન્ય થઈ નહોતી.
મુઝફ્ફરાબાદમાં હડતાળ
પોલીસની કાર્યવાહીના વિરોધમાં શનિવારે પીઓકેની રાજધાની મુઝફ્ફરાબાદમાં હડતાળ જોવા મળી હતી. આ સમયગાળા દરમિયાન ધંધા-રોજગાર બંધ રહ્યા હતા અને સામાન્ય જનજીવન પણ પ્રભાવિત થયું હતું. સુરક્ષા દળો અને દેખાવકારો વચ્ચેની અથડામણમાં એક પાકિસ્તાની પોલીસ અધિકારીનું પણ મોત થયું હતું.
એક પોલીસ અધિકારીનું મોત અને 90 ઘાયલ
PoJKમાં ચાલી રહેલા વિરોધ પ્રદર્શન અને શટડાઉન હડતાલ દરમિયાન હિંસક અથડામણમાં ઓછામાં ઓછા એક પોલીસ અધિકારીનું મોત થયું હતું અને અન્ય 90 ઘાયલ થયા હતા. અહેવાલો અનુસાર, મીરપુરના વરિષ્ઠ પોલીસ અધિક્ષક (એસએસપી) કામરાન અલીના સબ-ઇન્સ્પેક્ટર અદનાન કુરેશીનું ઇસ્લામગઢ શહેરમાં છાતીમાં ગોળી વાગવાથી મૃત્યુ થયું હતું, જ્યાં તેઓ મુઝફ્ફરાબાદની રેલીને રોકવા માટે અન્ય પોલીસ કર્મચારીઓ સાથે તૈનાત હતા.
આ શહેરોમાં જોરદાર દેખાવો થયા હતા
તમને જણાવી દઈએ કે જમ્મુ અને કાશ્મીર જોઈન્ટ અવામી એક્શન કમિટી (JKJAAC)ના કોલ પર શુક્રવારે મુઝફ્ફરાબાદમાં શટર-ડાઉન અને વ્હીલ-જામ હડતાળનું આયોજન કરવામાં આવ્યું હતું. આ દરમિયાન પોલીસે ટીયર ગેસના શેલ છોડ્યા હતા, જેના કારણે ઘરોમાં રહેતા લોકો પ્રભાવિત થયા હતા. ડૉન અખબારના અહેવાલ મુજબ, વિરોધીઓએ પથ્થરમારો કર્યા બાદ મસ્જિદો પર પણ પથ્થરમારો કરવામાં આવ્યો હતો. પીઓકેના સમહાની, સેહંસા, મીરપુર, રાવલકોટ, ખુઇરત્તા, તત્તાપાની, હટ્ટિયન બાલામાં વિરોધ પ્રદર્શનો થયા.
શું છે સમગ્ર મામલો?
જેકેજેએસીના અનેક નેતાઓ અને કાર્યકરોની પોલીસ દ્વારા ધરપકડ કરવામાં આવ્યા બાદ શુક્રવારે હડતાળનું એલાન કરવામાં આવ્યું હતું. હકીકતમાં, સમિતિએ ગયા મહિને જાહેરાત કરી હતી કે રાજ્યભરમાંથી લોકો 11 મેના રોજ મુઝફ્ફરાબાદ તરફ લોંગ માર્ચ કરશે.
દરમિયાન, એવું બહાર આવ્યું છે કે પીઓકેના મુખ્ય સચિવે ઇસ્લામાબાદમાં આંતરિક વિભાગના સચિવને પત્ર લખીને 11 મેની હડતાલને કારણે સુરક્ષા માટે છ સિવિલ આર્મ્ડ ફોર્સિસ (સીએએફ) પ્લાટૂન્સની માંગણી કરી હતી. આને ધ્યાનમાં રાખીને, સરકારે સમગ્ર પીઓકેમાં કલમ 144 લાગુ કરી હતી અને 10 અને 11 મેના રોજ તમામ શૈક્ષણિક સંસ્થાઓમાં રજા જાહેર કરી હતી. જોકે, પીઓકેના તમામ જિલ્લાઓમાં હજારો લોકો રસ્તા પર ઉતરી આવ્યા હતા.
