યુએસ પ્રમુખ જો બિડેન અને તેમના પરિવારને 2023માં વિદેશી નેતાઓ પાસેથી લાખો ડોલરની ભેટ મળી હતી. આમાં સૌથી મૂલ્યવાન ભેટ વડાપ્રધાન નરેન્દ્ર મોદીએ જીલ બિડેનને આપેલ 20 હજાર યુએસ ડોલર (રૂ. 17,14,482)નો હીરો છે. વિદેશ મંત્રાલય દ્વારા જાહેર કરાયેલા વાર્ષિક હિસાબોમાં આ માહિતી બહાર આવી છે. આ મુજબ, પીએમ મોદીએ આપેલો 7.5 કેરેટનો હીરો 2023માં રાષ્ટ્રપતિના પરિવારના કોઈપણ સભ્યને મળેલો સૌથી મોંઘો ગિફ્ટ છે. આ ઉપરાંત, બિડેન પરિવારને યુ.એસ.માં યુક્રેનિયન રાજદૂત પાસેથી 14,063 યુએસ ડોલરની કિંમતનું ‘બ્રોચ’ અને ઇજિપ્તના રાષ્ટ્રપતિ અને પ્રથમ મહિલા પાસેથી 4,510 યુએસ ડોલરનું બ્રેસલેટ, બ્રોચ અને ફોટો આલ્બમ પણ મળ્યું હતું.
મંત્રાલયના દસ્તાવેજ અનુસાર પીએમ મોદી દ્વારા ગિફ્ટમાં આપવામાં આવેલ 20 હજાર યુએસ ડોલરના હીરાને ‘વ્હાઈટ હાઉસ’ની ઈસ્ટ વિંગમાં રાખવામાં આવ્યો છે. રાષ્ટ્રપતિ અને પ્રથમ મહિલા દ્વારા મળેલી અન્ય ભેટો આર્કાઇવ્સમાં મોકલવામાં આવી છે. ખુદ અમેરિકી રાષ્ટ્રપતિ બિડેનને ઘણી મોંઘી ભેટ મળી હતી. હાલમાં મહાભિયોગનો સામનો કરી રહેલા દક્ષિણ કોરિયાના રાષ્ટ્રપતિ યુન સુક યેઓલે US$7,100ની કિંમતનું ફોટો આલ્બમ ભેટમાં આપ્યું હતું. મોંગોલિયન વડા પ્રધાને 3,495 યુએસ ડોલરની કિંમતની મોંગોલ યોદ્ધાઓની પ્રતિમા આપી છે. બ્રુનેઈના સુલતાન પાસેથી 3,300 યુએસ ડોલરની કિંમતની ચાંદીની વાટકી મળી આવી છે. ઇઝરાયેલના રાષ્ટ્રપતિ તરફથી US$3,160 ની ચાંદીની ટ્રે અને યુક્રેનના રાષ્ટ્રપતિ વોલોડીમીર ઝેલેન્સકીના US$2,400 કોલાજનો સમાવેશ થાય છે.
અમેરિકાના રાષ્ટ્રીય સુરક્ષા સલાહકાર ભારતની મુલાકાતે છે
ફેડરલ કાયદા હેઠળ, એક્ઝિક્યુટિવ બ્રાન્ચના અધિકારીઓએ વિદેશી નેતાઓ અને સમકક્ષો પાસેથી મળેલી ભેટો જાહેર કરવી જરૂરી છે જેની અંદાજિત કિંમત US$480 કરતાં વધી ગઈ છે. નોંધનીય છે કે અમેરિકાના રાષ્ટ્રીય સુરક્ષા સલાહકાર જેક સુલિવાન આગામી સપ્તાહે ભારત-યુએસ પહેલ ICETની સમીક્ષા કરવા ભારતની મુલાકાતે આવે તેવી શક્યતા છે. ICET એ આર્ટિફિશિયલ ઇન્ટેલિજન્સ, સેમિકન્ડક્ટર, બાયોટેકનોલોજી અને ડિફેન્સ ઇનોવેશન જેવી ઉભરતી ટેક્નોલોજીના ક્ષેત્રોમાં સીમાચિહ્નરૂપ પહેલનું પ્રતિનિધિત્વ કરે છે. સુલિવાનની મુલાકાત યુએસ બિડેન વહીવટીતંત્ર દ્વારા નવી દિલ્હીની છેલ્લી ઉચ્ચ સ્તરીય મુલાકાત હશે. ડોનાલ્ડ ટ્રમ્પ 20 જાન્યુઆરીએ અમેરિકાના 47માં રાષ્ટ્રપતિ તરીકે શપથ લેશે. સુલિવાન 6 જાન્યુઆરીએ દિલ્હીમાં હશે અને રાષ્ટ્રીય સુરક્ષા સલાહકાર અજીત ડોભાલ સાથે ચર્ચા કરશે.
