બે મિત્રોએ ફ્લાઈટની મુસાફરી કર્યા વિના લીધી આટલા દેશોની મુલાકાત, જાણો ‘નો ફ્લાઈટ’ મુસાફરી પાછળનો આ ખાસ હેતુ

ઇટાલીના ટોમ્માસો ફરિનમ અને સ્પેનના એડ્રિયન લાફ્યુએન્ટે મળીને 27 દેશોની ‘નો ફ્લાઇટ’ ટ્રીપ કરી છે, જેની પાછળનો હેતુ ખૂબ જ ખાસ છે.

ટ્રેન અને ફ્લાઇટ લાંબા અંતરની મુસાફરીના બે મુખ્ય માધ્યમો છે. ટ્રેન દ્વારા તમે ઓછા પૈસામાં લાંબા અંતરની મુસાફરી કરી શકો છો, જ્યારે ફ્લાઇટ દ્વારા તમે ઓછા સમયમાં ઘણા દેશોને પાર કરી શકો છો. દેશની અંદર ટ્રેનમાં મુસાફરી કરવી શક્ય હોવા છતાં, વિદેશી દેશો માટે ફ્લાઇટ ફરજિયાત છે. જો તમે પણ એવું માનતા હોવ તો કદાચ તમે ખોટા છો, કારણ કે બે યુરોપીયન મિત્રોએ એક-બે નહીં પરંતુ 27 દેશોની કોઈ પણ ફ્લાઈટ વિના મુસાફરી કરીને બધાને ચોંકાવી દીધા છે. ઇટાલીના ટોમ્માસો ફરિનમ અને સ્પેનના એડ્રિયન લાફ્યુએન્ટે મળીને 27 દેશોની ‘નો ફ્લાઇટ’ ટ્રીપ કરી છે, જેની પાછળનો હેતુ ખૂબ જ ખાસ છે.

પર્યાવરણને અનુકૂળ મુસાફરી

Tommaso Farinum અને Adrian Lafuente નો ઉડાન વગર ઘણા દેશોમાં પ્રવાસ કરવા પાછળનો હેતુ પર્યાવરણની રક્ષા કરવાનો હતો. પોતાના કાર્બન ફૂટપ્રિન્ટને ઘટાડવા અને ઈકો-ફ્રેન્ડલી મુસાફરી કરવા માટે, તેણે બોટમાં વિવિધ દેશોની યાત્રા કરી છે. પોતાને ‘સસ્ટેનેબલ એક્સપ્લોરર’ ગણાવતા આ બંને મિત્રોએ માત્ર 15 મહિનામાં જ બોટની મદદથી 27 દેશોનો પ્રવાસ કર્યો છે. ઇકો-ફ્રેન્ડલી હોવા ઉપરાંત, તે તેમના માટે બજેટ-ફ્રેન્ડલી પણ સાબિત થયું. વ્યક્તિદીઠ 6 લાખ 46 હજાર રૂપિયા ખર્ચીને બંને મિત્રો 27 દેશોની મુલાકાતે ગયા છે.

બોટના કેપ્ટન સાથે ફેસબુક પર વાત કરી

એક ઈન્ટરવ્યુમાં ટોમ્માસો ફેરીનમ અને એડ્રિયન લાફ્યુએન્ટે જણાવ્યું હતું કે તેમની ઘણી રાઈડમાંથી એક ફેસબુક દ્વારા ગોઠવવામાં આવી હતી. બોટના કેપ્ટન સાથે ફેસબુક પર વાત કર્યા બાદ રાઈડ નક્કી કરવામાં આવી હતી. જ્યારે તેણે કોઈપણ અનુભવ વિના બોટ દ્વારા એટલાન્ટિક પાર કરવાનું નક્કી કર્યું ત્યારે તેનો પરિવાર ખૂબ જ ડરી ગયો હતો. ફરિનામે એક ઈન્ટરવ્યુમાં સ્વીકાર્યું હતું કે પનામાની ખાડીમાં પહેલા 10 દિવસ ખૂબ જ ભયંકર હતા.