બુધવારે સુરતના સચિન GIDC વિસ્તારમાં સિલિન્ડર બ્લાસ્ટ થયો હતો. આ સિલિન્ડર બ્લાસ્ટમાં ત્યાંથી પસાર થતી એક મહિલાનું મોત થયું. સિલિન્ડર બ્લાસ્ટ એટલો ગંભીર હતો કે મહિલાના શરીરના ટુકડા થઈ ગયા. ઘટનાની માહિતી મળતા જ ફાયર બ્રિગેડ અને પોલીસ સ્ટાફ ઘટનાસ્થળે પહોંચી ગયો હતો. આ પછી, મહિલાના મૃતદેહને પોસ્ટમોર્ટમ માટે નવી સિવિલ હોસ્પિટલમાં લઈ જવામાં આવ્યો.
સિલિન્ડર બ્લાસ્ટની તસવીરો પણ સીસીટીવીમાં કેદ થઈ ગઈ છે. સીસીટીવી ફૂટેજમાં દેખાય છે કે દુકાન બંધ છે અને બધું રાબેતા મુજબ ચાલી રહ્યું છે અને થોડીક સેકન્ડ પછી, દુકાનમાં રાખેલ એક સિલિન્ડર અચાનક બ્લાસ્ટ થાય છે. વિસ્ફોટ થતાં જ દુકાનનું શટર અને દિવાલ નીચે પડી જાય છે. સીસીટીવીમાં એક મહિલા રસ્તા પરથી આવતી દેખાય છે, આ વિસ્ફોટને કારણે તેનું ઘટનાસ્થળે જ મોત થઈ જાય છે. મૃતક મહિલાનું નામ ભૂરીબેન યાદવ છે.
સચિન જીઆઈડીસી પોલીસ ઇન્સ્પેક્ટર કે. એ. ગોહિલે જણાવ્યું હતું કે બાલકેશ મિશ્રા 8 થી 9 વર્ષથી સચિન GIDC વિસ્તારમાં યોગેશ્વર પાર્ક સોસાયટીના ગોસ્વામી ચાલમાં દુકાન ચલાવે છે. બુધવારે, લગભગ ૧૨ થી ૧૨:૧૫ વાગ્યે, ભૂરીબેન ત્યાંથી પસાર થઈ રહ્યા હતા ત્યારે અચાનક ધડાકો થયો અને તેમનું ઘટનાસ્થળે જ મૃત્યુ થયું. મૃતક મહિલાની પુત્રી સીમા યાદવે તેની માતાના મૃત્યુ માટે સિલિન્ડરમાં ગેરકાયદેસર ગેસ ભરવાને જવાબદાર ઠેરવ્યું છે.
