ટીમ ઈન્ડિયાનો અનુભવી ખેલાડી સંજુ સેમસન ઈજાના કારણે મેદાનની બહાર છે. સેમસનને તેની આંગળીમાં ગંભીર ઈજા થઈ હતી. એક રિપોર્ટ અનુસાર, સંજુએ તાજેતરમાં આંગળીની સર્જરી કરાવી છે. સોશિયલ મીડિયા પર સેમસનનો એક ફોટો શેર કરવામાં આવ્યો છે. આમાં તે ડોક્ટરોની ટીમ સાથે જોવા મળે છે. હવે સંજુના IPL 2025 માં રમવા પર પણ ખતરો છે. જોકે, રાજસ્થાન રોયલ્સે હજુ સુધી આ અંગે કોઈ અપડેટ શેર કર્યું નથી.
વાસ્તવમાં સેમસન ભારત અને ઇંગ્લેન્ડ વચ્ચે રમાયેલી પાંચ મેચની T20 શ્રેણીનો ભાગ હતો. આ શ્રેણીમાં તેમનું પ્રદર્શન કંઈ ખાસ જોવા મળ્યું નહીં. આ શ્રેણીની પાંચમી મેચ દરમિયાન સંજુ ઘાયલ થયો હતો. ઈંગ્લેન્ડના ફાસ્ટ બોલર જોફ્રા આર્ચરના બોલથી સેમસનની આંગળીમાં ગંભીર ઈજા થઈ હતી. ફ્રેક્ચરને કારણે તેને સર્જરી કરાવવી પડી. હવે ડોક્ટરોની ટીમ સાથે સેમસનનો ફોટો વાયરલ થઈ રહ્યો છે.
શું સેમસન આઈપીએલ 2025માંથી બહાર થશે
રાજસ્થાન રોયલ્સ તરફથી સેમસન અંગે કોઈ સત્તાવાર માહિતી મળી નથી. ટુર્નામેન્ટ શરૂ થવામાં હજુ એક મહિનાથી વધુ સમય બાકી છે. તેથી, સ્વસ્થ થયા પછી સંજુ રાજસ્થાનનું નેતૃત્વ કરી શકે છે. પરંતુ તે સંપૂર્ણપણે તેની ફિટનેસ પર નિર્ભર રહેશે.
સેમસનનો અત્યાર સુધીનો રેકોર્ડ આવો રહ્યો છે
સેમસન અત્યાર સુધીમાં IPLમાં 167 મેચ રમી ચૂક્યો છે. આ સમયગાળા દરમિયાન તેણે 4419 રન બનાવ્યા છે. સેમસને ટુર્નામેન્ટમાં 3 સદી અને 25 અડધી સદી પણ ફટકારી છે. તેણે અત્યાર સુધીમાં ભારત માટે 42 ટી20 મેચ રમી છે. આ સમયગાળા દરમિયાન સેમસને ૮૬૧ રન બનાવ્યા છે. તેણે ટીમ ઈન્ડિયા માટે 3 સદી અને 2 અડધી સદી ફટકારી છે.
