અફઘાનિસ્તાને દક્ષિણ આફ્રિકાને હરાવીને કર્યો મોટો ઉલટફેર, સિરીઝ જીતીને રચ્યો ઇતિહાસ

અફઘાનિસ્તાને ઇતિહાસ રચ્યો છે. તેણે પ્રથમ વખત દક્ષિણ આફ્રિકાને વનડે શ્રેણીમાં હરાવ્યું છે. અફઘાનિસ્તાન અને દક્ષિણ આફ્રિકા વચ્ચે ત્રણ મેચની વનડે શ્રેણી રમાઈ રહી છે. અફઘાનિસ્તાને આ શ્રેણીની પ્રથમ બે મેચ જીતી લીધી છે. અફઘાનિસ્તાને બીજી વનડેમાં દક્ષિણ આફ્રિકાને ખરાબ રીતે હરાવ્યું. તેણે આ મેચ 177 રનથી જીતી હતી. ટીમ માટે રહેમાનુલ્લા ગુરબાઝે સદી ફટકારી હતી. જ્યારે રાશિદ ખાને 5 વિકેટ લીધી હતી.(afg v/s SA)

અફઘાનિસ્તાનની ટીમ પ્રથમ બેટિંગ કરવા મેદાનમાં આવી હતી. આ દરમિયાન તેણે 50 ઓવરમાં 4 વિકેટ ગુમાવીને 311 રન બનાવ્યા હતા. અફઘાનિસ્તાન તરફથી ગુરબાઝે સદી ફટકારી હતી. તેણે 110 બોલનો સામનો કરીને 105 રન બનાવ્યા હતા. આ દરમિયાન તેણે 10 ફોર અને 3 સિક્સર ફટકારી હતી. રહમતે અડધી સદી ફટકારી હતી. તેણે 66 બોલમાં 50 રન બનાવ્યા હતા. અઝમતુલ્લાએ અણનમ 86 રન બનાવ્યા હતા. 50 બોલનો સામનો કરીને તેણે 5 ફોર અને 6 સિક્સર ફટકારી હતી.

આફ્રિકાની ટીમ 34.2 ઓવરમાં પડી ભાંગી

અફઘાનિસ્તાન દ્વારા આપવામાં આવેલા ટાર્ગેટનો સામનો કરતી આફ્રિકન ટીમ 134 રનના સ્કોર પર સમેટાઈ ગઈ હતી. દક્ષિણ આફ્રિકાનો કોઈ ખેલાડી અડધી સદી ફટકારી શક્યો નહોતો. તેના તરફથી કેપ્ટન ટેમ્બા બાવુમાએ સૌથી વધુ 38 રન બનાવ્યા. ટોની ડી જ્યોર્જી 31 રન બનાવીને પેવેલિયન પરત ફર્યો હતો. રીસ હેન્ડ્રીક્સ માત્ર 17 રન બનાવી શક્યો હતો. એડન માર્કરામ 21 રન બનાવીને આઉટ થયો હતો. આ રીતે આખી ટીમ 34.2 ઓવરમાં ઓલઆઉટ થઈ ગઈ હતી.

રાશિદે 5 વિકેટ લીધી

અફઘાનિસ્તાન તરફથી રાશિદ ખાન અને નાંગેલિયા ખારોટે ઘાતક બોલિંગ કરી હતી. રાશિદને પ્લેયર ઓફ ધ મેચ પણ પસંદ કરવામાં આવ્યો હતો. તેણે 9 ઓવરમાં માત્ર 19 રન આપીને 5 વિકેટ ઝડપી હતી. રાશિદે મેડન ઓવર પણ ફેંકી હતી. ખરોટેએ 6.2 ઓવરમાં 26 રન આપીને 4 વિકેટ ઝડપી હતી. અઝમતુલ્લાને પણ સફળતા મળી.