Britain New Banknote: બ્રિટનમાં નવી નોટો જારી કરવામાં આવી છે. હવે મહારાણી એલિઝાબેથના ફોટાને બદલે વર્તમાન રાજા કિંગ ચાર્લ્સ ત્રીજાનો ફોટો બ્રિટનની નોટો પર હશે. બેંક ઓફ ઈંગ્લેન્ડે આ જાણકારી આપી છે.નવી નોટો જારી કરવાની સાથે બેંકે સ્પષ્ટ કર્યું કે આ નોટબંધી નથી. મતલબ કે ક્વીન એલિઝાબેથ ધરાવતો ફોટો પણ માન્ય રહેશે.
નવી નોટ કેટલી અલગ છે?
બ્રિટનની નવી નોટમાં વધારે ફેરફાર નથી. આ નોટમાં માત્ર તસવીર બદલાઈ છે. કિંગ ચાર્લ્સ III ની છબી ધરાવતી નોટ પહેલીવાર ડિસેમ્બર 2022 માં જારી કરવામાં આવી હતી. આ નોટ ક્વીન એલિઝાબેથ દ્વિતીયના મૃત્યુ બાદ બહાર પાડવામાં આવી હતી. તમને જણાવી દઈએ કે રાણી એલિઝાબેથ IIનું નિધન સપ્ટેમ્બર 2022માં થયું હતું.
આ પહેલીવાર છે જ્યારે બ્રિટિશ કરન્સી પર રાજાનું નામ બદલવામાં આવ્યું છે. હવે બ્રિટનના બ્રિટિશ પાઉન્ડ સ્ટર્લિંગ 5, 10, 20 અને 50ની નોટો પર રાજા ચાર્લ્સ ત્રીજાની તસવીર દેખાશે. બેંક ઓફ ઈંગ્લેન્ડે નવી નોટોને લઈને એક પ્રેસ રિલીઝ જાહેર કરી હતી. બેંકે કહ્યું કે એવી આશા છે કે નવી નોટો ધીમે ધીમે ચલણમાં આવશે. બેંકે કહ્યું કે જૂની ઘસાઈ ગયેલી નોટોની જગ્યાએ નવી નોટો છાપવામાં આવી છે.
બેંકની અખબારી યાદી અનુસાર, નવી નોટો 5 જૂન, 2024થી અમલમાં આવી છે. બેંક ઓફ ઈંગ્લેન્ડે લંડનના બકિંગહામ પેલેસમાં નવી નોટોનો પ્રથમ સેટ રજૂ કર્યો. બકિંગહામ પેલેસે નવી નોટો અંગે પોતાની પ્રતિક્રિયા આપી હતી. બકિંગહામ પેલેસે કહ્યું કે આ એક ઐતિહાસિક ક્ષણ છે. બેંક ઓફ ઈંગ્લેન્ડે પહેલીવાર નોટો પર બ્રિટિશ રાજાની તસવીર બદલી છે તમને જણાવી દઈએ કે કિંગ ચાર્લ્સ III હાલમાં કેન્સરની સારવાર લઈ રહ્યા છે.
