અભિનેતા-રાજકારણી મિથુન ચક્રવર્તી વિશે ચિંતાજનક સમાચાર સામે આવ્યા છે. મિથુન ચક્રવર્તીને હોસ્પિટલમાં દાખલ કરવામાં આવ્યા છે. અભિનેતાને શનિવારે, 10 ફેબ્રુઆરીએ કોલકાતાની એપોલો હોસ્પિટલમાં લઈ જવામાં આવ્યો છે. અભિનેતાની તબિયત સારી ન હોવાથી તેને હોસ્પિટલમાં લઈ જવામાં આવ્યો હતો. પીઢ અભિનેતા અને બીજેપી નેતા મિથુન ચક્રવર્તીની તબિયત વિશે જાણ્યા બાદ તેમના ચાહકોમાં ચિંતાનું વાતાવરણ છે. અભિનેતાની કોલકાતાની એપોલો હોસ્પિટલમાં સારવાર ચાલી રહી છે.
મિથુન ચક્રવર્તી હોસ્પિટલમાં દાખલ
મિથુન ચક્રવર્તી 73 વર્ષના છે. તમને જણાવી દઈએ કે, 10 ફેબ્રુઆરી, શનિવારની સવારે મિથુન ચક્રવર્તીને અચાનક છાતીમાં દુખાવો અને બેચેનીનો અનુભવ થયો, જેના પછી તેમને તાત્કાલિક હોસ્પિટલમાં લઈ જવામાં આવ્યા. હાલ તેમની તબિયત સ્થિર છે. હવે ચિંતા કરવાની કોઈ વાત નથી. ચાહકો તેના સાજા થવા માટે પ્રાર્થના કરી રહ્યા છે.
મિથુન ચક્રવર્તીને પદ્મ ભૂષણ મળ્યો છે
પીઢ અભિનેતા મિથુન ચક્રવર્તીને તાજેતરમાં પ્રતિષ્ઠિત પદ્મ ભૂષણ એવોર્ડથી સન્માનિત કરવામાં આવ્યા હતા. મિથુનને હિન્દી સિનેમામાં ડિસ્કો ડાન્સર તરીકે પણ ઓળખવામાં આવે છે. પોતાના અભિનય કરિયરમાં તેણે ‘પરિવાર’, ‘મેરા યાર મેરા દુશ્મન’, ‘બાત બના જાયે’ અને ‘દીવાના તેરે નામ’ જેવી લગભગ 350 ફિલ્મોમાં કામ કર્યું છે. મિથુન ગયા વર્ષે નવેમ્બરમાં ટીવી શો ‘સારેગાપામા’ના એપિસોડમાં મુખ્ય અતિથિ તરીકે જોવા મળ્યો હતો. તેણે ઘણી શાનદાર ફિલ્મોમાં કામ કર્યું છે. અભિનેતાએ ઘણા ટીવી શોને જજ પણ કર્યા છે.
મિથુન ચક્રવર્તીની આગામી ફિલ્મ
છેલ્લા 15 દિવસથી એક્ટર મિથુન કોલકાતામાં બંગાળી ફિલ્મ ‘શાસ્ત્રી’ના શૂટિંગમાં વ્યસ્ત હતો. વિવેક અગ્નિહોત્રીની ફિલ્મ ‘ધ કાશ્મીર ફાઇલ્સ’ બાદ મિથુન ચક્રવર્તી છેલ્લે બંગાળી ફિલ્મ ‘કાબુલીવાલા’માં જોવા મળ્યો હતો. ફિલ્મ ‘ધ કાશ્મીર ફાઇલ્સ’માં નિવૃત્ત IASની ભૂમિકા ભજવવા બદલ તેમને શ્રેષ્ઠ સહાયક અભિનેતાનો ‘ફિલ્મફેર એવોર્ડ’ પણ એનાયત કરવામાં આવ્યો હતો.
