- માલદીવની સરકારે અગાઉ પાણીમા ૩૦ મિનિટ સુધી બેઠક યોજી
- આ દેશ વર્ષ ૨૧૦૦ સુધીમાં સમુદ્રમાં ડૂબી જવાનું અનુમાન વ્યક્ત કરતા વૈજ્ઞાનિકો
- વૈશ્વિક તાપમાનને કારણે માલદીવ જેવા રાષ્ટ્રો અસ્તિત્વના સંકટનો સામનો કરી રહ્યા છે
વડાપ્રધાન નરેન્દ્ર મોદીએ લક્ષદ્વીપના સમુદ્રમાં ડૂબકી લગાવી અને લોકોને ત્યાં જવાની અપીલ પણ કરી. તેમની તસવીરો જોઈને માલદીવના મંત્રીઓ એટલા ગુસ્સામાં આવી ગયા કે તેમણે વડાપ્રધાન વિરુદ્ધ વાંધાજનક નિવેદનો પણ કર્યા. પરિણામે માલદીવ સરકારે ગભરાઈને તે મંત્રીઓ અને નેતાઓને સસ્પેન્ડ કરી દીધા હતા.
તેમ છતાં લોકોનો રોષ શમ્યો ન હતો. આજે પણ માલદીવ લોકોના ગુસ્સાનો શિકાર બની રહ્યું છે. પરંતુ શું તમે જાણો છો કે એકવાર માલદીવમાં સમુદ્રની નીચે કેબિનેટની બેઠક યોજાઈ હતી. આખી સરકાર ૩૦ મિનિટમાં પાણીમાં ડૂબી ગઈ હતી. કારણ જાણીને તમે પણ ચોંકી જશો.
મામલો ઓક્ટોબર ૨૦૦૯નો છે. વધતા વૈશ્વિક તાપમાનને કારણે માલદીવ જેવા રાષ્ટ્રો અસ્તિત્વના સંકટનો સામનો કરી રહ્યા છે. તેમના ડૂબી જવાનો ભય છે. કારણ કે માલદીવનો મોટા ભાગનો વિસ્તાર સમુદ્ર સપાટીથી માત્ર એક મીટર ઉપર છે. વૈજ્ઞાનિકોનું અનુમાન છે કે આ દેશ વર્ષ ૨૧૦૦ સુધીમાં સમુદ્રમાં ડૂબી જશે. ખતરો એટલો મોટો છે કે દર વર્ષે તેનો કેટલોક ભાગ દરિયાના પાણીમાં સમાઈ જાય છે. ઊંચા તાપમાનના કારણે, બરફ પીગળી રહ્યો છે, એટલે સંકટ વધુ વધશે. તેનાથી પોતાને બચાવવા અને દુનિયાને આ સંકટથી ચેતવવા માટે ત્યાંની સરકારે એક નિર્ણય લીધો હતો. ઑક્ટોબર ૧૯, ૨૦૦૯ ના રોજ, માલદીવની સમગ્ર સરકારે પાણીની અંદર એક બેઠક યોજી હતી. આ બેઠક ૩૦ મિનિટ સુધી ચાલી હતી.
માલદીવના રાષ્ટ્રપતિ મોહમ્મદ નશીદની અધ્યક્ષતામાં યોજાયેલી આ કેબિનેટ બેઠકમાં ૧૧ મંત્રીઓ અને કેબિનેટ સચિવોએ પણ ભાગ લીધો હતો. આ બેઠક ૧૫ ફૂટ પાણી નીચે થઈ હતી, જેના માટે તમામ મંત્રીઓ ડૂબકી મારીને દરિયામાં ઉતર્યા હતા. દરેક વ્યક્તિએ એક દસ્તાવેજ પર હસ્તાક્ષર કર્યા જેમાં વિશ્વના તમામ દેશોને ખતરનાક વાયુઓના ઉત્સર્જનને ઘટાડવાની માંગ કરવામાં આવી હતી. તે સમયે વાયરલ થયેલા વીડિયોમાં તમામ નેતાઓ કાળા ડાઈવિંગ સૂટ અને માસ્ક પહેરેલા જોઈ શકાય છે.
તેમજ રાષ્ટ્રપતિ અને મંત્રીઓને બેસવા માટે ટેબલ ગોઠવવામાં આવ્યા હતા. રાષ્ટ્રપતિ સહિત તમામ મંત્રીઓની આસપાસ માછલીઓ પણ તરતી જોવા મળી હતી. મંત્રીઓ અને રાષ્ટ્રપતિએ પાણીની અંદર હાથના ઈશારાથી વાત કરી અને વોટરપ્રૂફ બોર્ડ પર ટિપ્પણીઓ લખવામાં આવી. સરકારે કહ્યું કે જોખમની કોઈ જરૂર નથી. કારણ કે દરેક મંત્રીને કુશળ મરજીવા સાથે મોકલવામાં આવ્યા હતા. માલદીવમાં શાર્ક પણ બહુ આક્રમક નથી, તેથી તેમના હુમલાનો કોઈ ભય નહોતો; રાષ્ટ્રપતિ નશીદ પોતે કુશળ ડાઇવર રહી ચૂક્યા છે. વિશ્વમાં આ પહેલો કિસ્સો હતો.
