- BSE પર લિસ્ટેડ કંપનીઓનું માર્કેટ કેપિટલાઇઝેશન પ્રથમ વખત 4 ટ્રિલિયન ડોલરને વટાવી ગયું
ભારતીય શેરબજારમાં ઐતિહાસિક સિદ્ધિ જોવા મળી છે. BSE પર લિસ્ટેડ કંપનીઓનું માર્કેટ કેપિટલાઇઝેશન પ્રથમ વખત 4 ટ્રિલિયન ડોલરને વટાવી ગયું છે અને આ એક ઐતિહાસિક સિદ્ધિ માનવામાં આવી રહી છે. વિશ્વભરના રોકાણકારો સ્થાનિક શેરબજારની વૃદ્ધિ પર નજર રાખી રહ્યા છે. આમ લાંબા સમયથી ભારતીય ઇક્વિટી માર્કેટને સૌથી ઝડપથી વિકસતું બજાર કહેવાય છે.. ત્યારે ભારતીય શેરબજાર આ ધારણાને વારંવાર સાબિત કરી રહ્યું છે.
હાલમાં BSEનું માર્કેટ કેપિટલાઇઝેશન રૂ. 3,33,15,463.77 કરોડ છે, એટલે કે તે રૂ. 333 લાખ કરોડના સ્તરને વટાવી ચૂકયુ છે. જો ડોલરના સંદર્ભમાં જોવામાં આવે તો તે 4.01 ટ્રિલિયન ડોલર પર આવી ગયો છે. બપોરે BSE સેન્સેક્સ 66,700ની સપાટી વટાવી ચૂકયો છે. અને હાલમાં 526 પોઈન્ટ વધીને ટ્રેડ કરી રહ્યો છે.
BSE પર લિસ્ટેડ કંપનીઓની માર્કેટ કેપ મે 2007માં $1 ટ્રિલિયનનો માઈલસ્ટોન હાંસલ કરી હતી. હવે વર્ષ 2023માં તે 4 ટ્રિલિયન ડોલર પર આવી ગયું છે. તેનો અર્થ એ કે, માત્ર 16 વર્ષમાં, BSE લિસ્ટેડ કંપનીઓએ $3 ટ્રિલિયનનું માર્કેટ કેપ એકત્રિત કર્યું છે, જે ખૂબ જ સારી બજાર વૃદ્ધિની નિશાની માનવામાં આવે છે.
 "ભારતીય શેરબજારમાં ઐતિહાસિક સિદ્ધિ, માર્કેટ કેપિટલાઇઝેશન રૂ. 333 લાખ કરોડના સ્તરને વટાવ્યું 1")
BSEનું માર્કેટ કેપ મે 2007માં $1 ટ્રિલિયન અને જુલાઈ 2017માં $2 ટ્રિલિયન સુધી પહોંચ્યું હતું. આ પછી, મે 2021 માં, BSE લિસ્ટેડ કંપનીઓનું કુલ માર્કેટ કેપ 3 ટ્રિલિયન ડોલરના સ્તરને સ્પર્શ્યું હતું. તેનો અર્થ એ કે $1 ટ્રિલિયનથી $2 ટ્રિલિયન થવામાં 10 વર્ષ લાગ્યાં પરંતુ $2 થી $3 ટ્રિલિયન થવામાં માત્ર 4 વર્ષ લાગ્યાં. સૌથી મહત્વની વાત એ છે કે આ પછી ભારતીય શેરબજારને 3 થી 4 ટ્રિલિયન ડોલરની માર્કેટ કેપ હાંસલ કરવામાં માત્ર 2 વર્ષ અને થોડા મહિના લાગ્યા છે.
ભારતીય ઇક્વિટી માર્કેટ હવે વૈશ્વિક શેરબજારોમાં પાંચમા સ્થાને આવી ગયું છે. આનાથી આગળ અમેરિકા, ચીન, જાપાન અને હોંગકોંગના બજારો છે. તેઓ યાદીમાં અનુક્રમે પ્રથમ, બીજા, ત્રીજા અને ચોથા સ્થાને છે. ચોથા સ્થાને હોંગકોંગના શેરબજારનું કુલ મૂલ્ય 4.8 ટ્રિલિયન ડોલર છે. આજે ભારતીય બજારની બજાર કિંમત 4.01 ટ્રિલિયન ડોલર થઈ ગઈ છે. આનો અર્થ એ થયો કે ભારત માટે બજાર મૂલ્યની દૃષ્ટિએ ચોથું સૌથી મોટું બજાર બનવામાં ઓછું અંતર બાકી છે.
આજે સ્થાનિક શેરબજારમાં જોરદાર ઉછાળો જોવા મળી રહ્યો છે અને નિફ્ટી ફરી 20 હજારને પાર કરી ગયો છે. 20 સપ્ટેમ્બર 2023 પછી પ્રથમ વખત તે આ સ્તરને પાર કરવામાં સફળતા મેળવી છે. આ વધારા પાછળનો મુખ્ય ટેકો આઈટી સેક્ટરનો છે જેમાં લગભગ દોઢ ટકાનો ઉછાળો આવ્યો છે અને ઓટો શેર્સ પણ તેની સાથે ગતિ જાળવી રહ્યા હોવાનું જણાય છે. બીએસઈ પર લગભગ 1,961 શેરો ઉછાળા સાથે ટ્રેડ થઈ રહ્યા છે અને અહીં 282 શેર ઉપલા સર્કિટ પર પહોંચ્યા છે અને બજારને તેજી આપી રહ્યા છે.
