ભારતીય કાર ખરીદનારા ઉપભોક્તાઓ કારની માઈલેજની સાથે તેની સલામતી અંગે પણ જાગૃત બન્યા છે. તેની અસર ઓટો કંપનીઓ દ્વારા લાવવામાં આવતા વાહનોના મોડલ પર જોવા મળી રહી છે. ઓટો કંપનીઓ સેફ્ટી પર ફોકસ વધારી રહી છે. હાલમાં તમામ કંપનીઓ બે એરબેગ ઓફર કરી રહી છે. આનાથી આગળ વધીને વાહન ઉત્પાદક કંપની હ્યુન્ડાઈ મોટર ઈન્ડિયાએ મંગળવારે કહ્યું કે હવે ભારતમાં તેના તમામ મોડલ છ એરબેગ સાથે આવશે. કંપનીએ એ પણ જાહેરાત કરી કે તેણે ત્રણ મોડલ સાથે તાજેતરમાં રજૂ કરાયેલ ઈન્ડિયા NCAP (ન્યૂ કાર એસેસમેન્ટ પ્રોગ્રામ)માં સ્વૈચ્છિક રીતે ભાગ લેવાનું નક્કી કર્યું છે. આ પછી, આ હેઠળ વધુ મોડલ રજૂ કરવામાં આવશે.
વર્નાને ફાઈવ સ્ટાર રેટિંગ મળ્યું છે
કાર કંપનીએ એ પણ જાહેરાત કરી કે તેની મિડ-સાઇઝ સેડાન ‘વર્ના’ને ફાઇવ-સ્ટાર રેટિંગ મળ્યું છે. વયસ્કો અને બાળકોની સુરક્ષા માટે વૈશ્વિક NCAP તરફથી આ રેટિંગ પ્રાપ્ત થયું છે. હ્યુન્ડાઈ મોટર ઈન્ડિયાના મેનેજિંગ ડિરેક્ટર અને ચીફ એક્ઝિક્યુટિવ ઑફિસર અનસૂ કિમે જણાવ્યું હતું કે લોકોની સુરક્ષા કંપનીની ટોચની પ્રાથમિકતા છે. તેમણે કહ્યું, “અમે વાહન સુરક્ષા સુવિધાઓના માનકીકરણમાં ‘બેન્ચમાર્ક’ સેટ કરનારાઓમાંના છીએ. હવે, અમે તમામ મોડલ્સ અને તમામ વેરિઅન્ટમાં છ એરબેગ્સની જાહેરાત કરવા માટે ઉત્સાહિત છીએ.”
સિક્યોરિટી પ્રમાણે 0-5નું સ્ટાર રેટિંગ આપવામાં આવશે
ઈન્ડિયા NCAP પ્રોગ્રામ હેઠળ કાર ઉત્પાદકો સ્વેચ્છાએ તેમના વાહનોને વેહિકલ ઈન્ડસ્ટ્રી સ્ટાન્ડર્ડ (AIS) 197માં પરીક્ષણ માટે સબમિટ કરી શકે છે. ટેસ્ટિંગમાં કારના પ્રદર્શનના આધારે, વાહનને પુખ્ત અને બાળકોની સુરક્ષા માટે 0-5નું સ્ટાર રેટિંગ આપવામાં આવશે. કાર ખરીદદારો વિવિધ વાહનોમાં સલામતી ધોરણોની તુલના કરવા અને તે મુજબ ખરીદીના નિર્ણયો લેવા માટે સ્ટાર રેટિંગનો ઉપયોગ કરી શકે છે.
