અમદાવાદ-બગોદરા હાઇવે પર ફરી એક વખત અકસ્માતની ઘટના બની છે. આ અકસ્માતમાં બે લોકોના મોત થયા છે જ્યારે બે અન્ય લોકોને ઇજા થતા સારવાર માટે હોસ્પિટલમાં ખસેડવામાં આવ્યા છે. અમદાવાદ બાવળા-બગોદરા હાઇવે પર રોયકા ગામના પૂલ પર અજાણ્યા વાહન સાથે કાર અથડાતા અકસ્માત સર્જાયો હતો. આ અકસ્માતમાં બાવળાના ગાગડ ગામના બે લોકોના મોત થયા હતા જ્યારે બે લોકોને ગંભીર ઇજા થઇ હતી.
ઇજાગ્રસ્તોને 108 એમ્બ્યુલન્સ મારફતે બગોદરા હોસ્પિટલમાં ખસેડવામાં આવ્યા હતા. જ્યા તેમની હાલત ગંભીર થતા વધુ સારવાર માટે અમદાવાદ ખસેડવામાં આવ્યા હતા. અકસ્માત એટલો જોરદાર હતો કે વોક્સ વેગન કારના પાછળના ભાગના ફૂરચે ફૂરચા ઉડી ગયા હતા. અકસ્માતને પગલે રસ્તા પર ટ્રાફિક જામના દ્રશ્યો પણ સર્જાયા હતા.અકસ્માતને પગલે સ્થાનિક લોકો તેમજ પોલીસ ઘટનાસ્થળે દોડી આવી હતી. પોલીસે અજાણ્યા વાહન ચાલક વિરૂદ્ધ અકસ્માતનો ગુનો નોંધીને વધુ તપાસ હાથ ધરી હતી.
