રામ ચરણ ‘RRR’ થી સમગ્ર ભારતના સ્ટાર તરીકે ઉભરી આવ્યા છે. હવે તે અભિનેત્રી કિયારા અડવાણી સાથે ફિલ્મ ‘ગેમ ચેન્જર’માં જોવા મળશે. ચાહકો લાંબા સમયથી રામ ચરણ અને કિયારા અડવાણીની ફિલ્મ ‘ગેમ ચેન્જર’ની રાહ જોઈ રહ્યા છે. રામ ચરણના ચાહકો હવે તેની બહુપ્રતિક્ષિત આગામી ફિલ્મ ‘ગેમ ચેન્જર’ની રિલીઝની આતુરતાથી રાહ જોઈ રહ્યા છે, પરંતુ અહેવાલો અનુસાર, ફિલ્મની રિલીઝમાં વિલંબ થઈ શકે છે, કારણ કે તેની રિલીઝ ફરી એક વખત મોકૂફ રાખવામાં આવી છે.
રામ ચરણની ફિલ્મ ‘ગેમ ચેન્જર’નું નિર્દેશન શંકરે કર્યું છે. ફિલ્મની રિલીઝમાં ફરી એકવાર વિલંબ થયો છે અને હવે 2025ના જાન્યુઆરી અથવા ઉનાળામાં સિનેમાઘરોમાં રિલીઝ થવાની ધારણા છે. ફિલ્મનું શૂટિંગ બંધ કરી દેવામાં આવ્યું છે અને વિલંબને કારણે આખી ટીમ નિરાશ છે. અહેવાલ છે કે વિલંબનું મુખ્ય કારણ પોતે દિગ્દર્શક શંકર છે, કારણ કે તે એક સાથે ‘ઇન્ડિયન 2’ માટે શૂટિંગ કરી રહ્યો છે, જેમાં કમલ હાસન મુખ્ય ભૂમિકામાં છે. પહેલાથી જ ઘણો વિલંબ થયો છે અને ચાહકો પણ આ સ્થિતિથી નારાજ છે.
આ ફિલ્મને શરૂઆતમાં 2023માં રિલીઝ કરવાની યોજના હતી, પરંતુ સતત વિલંબને કારણે તેને 2024 સુધી ધકેલી દેવામાં આવી હતી. હવે તેને ફરીથી 2025 સુધી વિલંબિત કરવાના સમાચારે લોકોમાં ભારે હલચલ મચાવી છે. મુખ્ય ભૂમિકાઓ ઉપરાંત, ફિલ્મમાં અંજલિ, એસજે સૂર્યા, જયરામ, સુનીલ, શ્રીકાંત અને નાસાર પણ મુખ્ય ભૂમિકામાં છે. ‘ગેમ ચેન્જર’નું નિર્માણ શ્રી વેંકટેશ્વર ક્રિએશનના બેનર હેઠળ દિલ રાજુ દ્વારા કરવામાં આવ્યું છે. સંગીત થમ્મમ એસ દ્વારા આપવામાં આવ્યું છે અને સિનેમેટોગ્રાફી થિરુ દ્વારા સંભાળવામાં આવી છે.
અગાઉ સપ્ટેમ્બરમાં પણ આ ફિલ્મનું શૂટિંગ કેન્સલ કરવામાં આવ્યું હોવાના અહેવાલ મળ્યા હતા. હકીકતમાં, કેટલાક મુખ્ય કલાકારોની અનુપલબ્ધતાને કારણે ફિલ્મનું સપ્ટેમ્બરનું શૂટિંગ શેડ્યૂલ રદ કરવામાં આવ્યું હતું. આ વિશે માહિતી આપતા, નિર્માતાએ સોશિયલ મીડિયા પર શેર કર્યું હતું કે, “કેટલાક કલાકારોની અનુપલબ્ધતાને કારણે જ ગેમ ચેન્જરનું સપ્ટેમ્બરનું શેડ્યૂલ રદ કરવામાં આવ્યું છે. ઑક્ટોબરના બીજા અઠવાડિયામાં શૂટિંગ ફરી શરૂ થશે.”
‘ગેમ ચેન્જર’ના વિલંબથી રામ ચરણના શેડ્યૂલ પર પણ અસર પડી છે. તાજેતરમાં, તેણે દિગ્દર્શક બુચી બાબુ સાથે તેની આગામી ફિલ્મની જાહેરાત કરી, જેનું કામચલાઉ શીર્ષક RC16 છે. ‘ગેમ ચેન્જર’ વિલંબ RC16 ને વધુ આગળ ધકેલશે. આ ફિલ્મમાં બોલિવૂડ એક્ટર ટાઈગર શ્રોફ નેગેટિવ રોલમાં જોવા મળશે એવી માહિતી પણ મળી હતી.
