PM મોદી હાલ બે દિવસીય પ્રવાસે છે ત્યારે આજે બીજા દિવસે દક્ષિણના રાજ્ય તમિલનાડુમાં અન્ના યુનિવર્સિટીના દીક્ષાંત સમારોહમાં હાજરી આપવા પહોંચ્યા હતા. તેઓ આજે સાંજે તેમના વતન ગુજરાત પહોંચશે. PM મોદી સાંજે 4 કલાકે ગુજરાતના ગાંધીનગરમાં ગુજરાત ઇન્ટરનેશનલ ફાઇનાન્સ ટેક-સિટી (ગિફ્ટ સિટી) ખાતે દેશના પ્રથમ આંતરરાષ્ટ્રીય બુલિયન એક્સચેન્જનું ઉદ્ઘાટન કરશે. આ સમયગાળા દરમિયાન તેઓ ઈન્ટરનેશનલ ફાઈનાન્સિયલ સર્વિસ સેન્ટર ઓથોરિટીના હેડક્વાર્ટર બિલ્ડિંગનો શિલાન્યાસ પણ કરશે.
ચેન્નાઈમાં PMનો કાર્યક્રમ
વડાપ્રધાન અન્ના યુનિવર્સિટીના 42માં દીક્ષાંત સમારોહમાં હાજરી આપી રહ્યા છે. તેઓ અહીં 69 ગોલ્ડ મેડલ વિજેતાઓને મેડલ અને પ્રમાણપત્રો આપશે. આ પ્રસંગે વડાપ્રધાન એક સભાને પણ સંબોધિત કરશે. નોંધનીય છે કે, અન્ના યુનિવર્સિટીની સ્થાપના 4 સપ્ટેમ્બર, 1978ના રોજ કરવામાં આવી હતી. તેનું નામ તમિલનાડુના પૂર્વ મુખ્યમંત્રી સીએન અન્નાદુરાઈના નામ પરથી રાખવામાં આવ્યું છે. જેમાં 13 સંલગ્ન કોલેજો, તમિલનાડુમાં ફેલાયેલી 494 સંલગ્ન કોલેજો અને ત્રણ પ્રાદેશિક કેમ્પસ- તિરુનેલવેલી, મદુરાઈ અને કોઈમ્બતુરનો સમાવેશ થાય છે.
PM મોદીનો ગુજરાતમાં કાર્યક્રમ
PM મોદી આજે ગાંધીનગરમાં ગિફ્ટ સિટીની મુલાકાત લેશે. ગિફ્ટ સિટી માત્ર ભારત માટે જ નહીં પરંતુ વિશ્વ માટે નાણાકીય અને તકનીકી સેવાઓ માટે એક સંકલિત હબ તરીકે બનાવવામાં આવ્યું છે. પ્રધાનમંત્રી ભારતમાં આંતરરાષ્ટ્રીય નાણાકીય સેવા કેન્દ્રો (IFSCs) માં નાણાકીય ઉત્પાદનો, નાણાકીય સેવાઓ અને નાણાકીય સંસ્થાઓના વિકાસ અને નિયમન માટે એકીકૃત નિયમનકાર, આંતરરાષ્ટ્રીય નાણાકીય સેવા કેન્દ્રો ઓથોરિટી (IFSCA) ના હેડક્વાર્ટર બિલ્ડિંગ માટે શિલાન્યાસ કરશે. આ ઈમારતને એક પ્રતિષ્ઠિત માળખા તરીકે પરિકલ્પના કરવામાં આવી છે, જે અગ્રણી આંતરરાષ્ટ્રીય નાણાકીય કેન્દ્ર તરીકે GIFT-IFSC ની વધતી જતી વિશેષતા અને કદને પ્રતિબિંબિત કરે છે.
