એનડીએ દ્વારા રાષ્ટ્રપતિ પદના ઉમેદવાર બનાવવામાં આવેલા આદિવાસી નેતા દ્રૌપદી મુર્મુના માટે ભાજપે રાજસ્થાનના આ5 આદિવાસી ધારાસભ્યોને દિલ્હી બોલાવ્યા છે.રાષ્ટ્રપતિની ચૂંટણી થકી ભારતીય જનતા પાર્ટી (BJP)એ પણ રાજસ્થાનની રાજનીતિ સંભાળવાનું શરૂ કરી દીધું છે. મેવાડના 5 ધારાસભ્યો દ્રૌપદી મુર્મુના પ્રસ્તાવક બનવા જઈ રહ્યા છે.
હાઈકમાન્ડે આ ધારાસભ્યોને દિલ્હી બોલાવ્યા છે અને તેઓ ગુરુવારે સવારે દિલ્હી પહોંચી ગયા છે. રસપ્રદ વાત એ છે કે મુર્મુના પ્રસ્તાવ તરીકે પાંચેય આદિવાસી સમાજના ધારાસભ્યોને જ પસંદ કરવામાં આવ્યા છે. આ ધારાસભ્યો ગુરુવારે સવારે ઉદયપુરના ડાબોક સ્થિત મહારાણા પ્રતાપ એરપોર્ટથી દિલ્હી જવા રવાના થયા હતા.આ પહેલા બુધવારે ભાજપ સંગઠન મહાસચિવ ચંદ્રશેખર અને વિપક્ષના નેતા ગુલાબચંદ કટારિયાએ ઉદયપુર ગ્રામીણના ધારાસભ્ય ફૂલસિંહ મીણા, સાલુમ્બરના ધારાસભ્ય અમૃતલાલ મીણા, ઝાડોલના ધારાસભ્ય બાબુલાલ ખરાડી, પિંડવાડાના ધારાસભ્ય સમરામ ગરાસિયા અને બાંસવાડા જિલ્લાના ગઢીના ધારાસભ્ય કૈલાશ મીણાને માહિતી આપી હતી.માહિતી મળતાં જ આ પાંચેય ધારાસભ્યોએ ટુંક સમયમાં જ દિલ્હી જવાની તૈયારીઓ પૂર્ણ કરી, તમામ દસ્તાવેજો સાથે સવારે એરપોર્ટ પર પહોંચી ગયા. ડાબોક એરપોર્ટ પર આ ધારાસભ્યોમાં જોશ જોવા મળ્યો હતો. સલુમ્બરના ધારાસભ્ય મીણાના પરિવારમાં કોઈ શુભ કાર્યક્રમ છે, પરંતુ તેમણે કહ્યું કે પહેલા મહત્વપૂર્ણ કામ છે.
