ભારતમાં પણ સરકારના કેશલેસ ઇન્ડિયા માટેના પ્રયાસોને કારણે હવે ક્રેડિટ કાર્ડનો ટ્રેન્ડ ફૂલ્યોફાલ્યો છે. વધુને વધુ લોકો હવે ક્રેડિટ કાર્ડના વપરાશ તરફ વળ્યા છે. જો ક્રેડિટ કાર્ડના વધતા વપરાશ સામે ભારતીયોના માથે દેવું સતત વધી રહ્યું છે. એ અંગે ચોંકાવનારા આંકડાઓ અનુસાર ક્રેડિટ કાર્ડની બાકી રકમ તેમજ ક્રેડિટનો સમય પૂરો થયા બાદ બેંકોના બાકી લેણાંની રકમ મે મહિના દરમિયાન 20 ટકા વધીને રૂ. 1.54 લાખ કરોડ પર પહોંચ્યું છે.
મે મહિનામાં 17 લાખ નવા ક્રેડિટ કાર્ડ ઇશ્યૂ કરાયા
ક્રેડિટ કાર્ડની સતત વધતી માંગને પહોંચી વળવા માટે મે મહિના દરમિયાન બેંકોએ કુલ 17 લાખ નવા ક્રેડિટ કાર્ડ ઇશ્યૂ કર્યા હતા. બીજી તરફ મે મહિનાના અંત સુધીમાં ક્રેડિટ કાર્ડધારકો પર રૂ.1.28 લાખ કરોડનું દેવું હતું. જો કે થોડાક સમય પહેલા બેંકો દ્વારા લોનના વ્યાજદરોમાં વધારો ઝીંકાયો છે જેની અસર પણ હવે જોવા મળે તેવી શક્યતા નકારી શકાય નહીં.
મે મહિનામાં ક્રેડિટ કાર્ડ થકી ખર્ચ રૂ. 1 લાખ કરોડને પાર
દેશમાં વધતા ક્રેડિટ કાર્ડના ચલણ પર એ વાતથી અંદાજ લગાવી શકાય કે, ભારતમાં માત્ર મે મહિનામાં જ ક્રેડિટ કાર્ડ થકી ખર્ચ રૂ. 1.14 લાખ કરોડનો નોંધાયો હતો જે વાર્ષિક તુલનાએ 118 ટકા તેમજ માસિક તુલનાએ 8 ટકા વધારે છે. રિઝર્વ બેંક દ્વારા જાહેર કરાયેલા રિપોર્ટ પ્રમાણે ક્રેડિટ કાર્ડધારકોએ ઑનલાઇન ખરીદી માટે અંદાજે રૂ. 71,429 કરોડ તેમજ પોઇન્ટ ઓફ સેલ (PoS) મશીનો પર સ્વાઇપ મારફતે રૂ.42,266 કરોડનો ખર્ચ કર્યો છે. એપ્રિલ મહિનામાં ઑનલાઇન ખરીદી માટે ક્રેડિટ કાર્ડથી રૂ.65,652 કરોડ તેમજ PoS મશીનથી રૂ39,806 કરોડ ખર્ચ કરવામાં આવ્યા હતા.
