દક્ષિણ ગુજરાતના ડાંગ, સુરત અને નવસારી તેમજ જિલ્લામાં સારો વરસાદ વરસ્યો હતો. દિવસ દરમિયાન સવારના 6 વાગ્યાથી સાંજના 8 વાગ્યા સુધીમાં કુલ 66 તાલુકામાં વરસાદી માહોલ સર્જાયો હતો જેમાથી 39 તાલુકા એવા હતા કે જ્યારે અડધાથી ચાર ઈંચ જેટલો વરસાદ નોંધાયો હતો. આજે સૌથી વધુ માત્ર બે કલાકમાં જ નવસારી જિલ્લાનાં ચીખલી તાલુકામાં 4 અને ડાંગના સુબીર તાલુકામાં સાડા ત્રણ ઈંચ વરસાદ ખાબક્યો હતો. ધોધમાર વરસાદના પગલે આ તાલુકાના વિસ્તારોમાં થોડો સમય માટે જળબંબાકારની સ્થિતિ સર્જાઈ હતી. આ સિવાય સુરતના ઓલપાડ તાલુકામાં 2 ઈંચ, જુનાગઢના મેંદરડા અને ભરૂચના અંકલેશ્વરમાં દોઢ ઈંચ વરસાદ વરસ્યો હતો. દક્ષિણ ગુજરાતના વિસ્તારોમાં વરસાદનો સિલસિલો યથાવત્ રહેતા દિવસે સાંજના 6 વાગ્યા સુધીમાં ડાંગ જિલ્લાના સુબીર ખાતે સાડા ત્રણ ઈંચ વરસાદ નોંધાયો હતો. મેઘ જમાવટનો સિલસીલો સમગ્ર જિલ્લામાં રહેતા વિસ્તારની તમામ નદીઓમાં નવા નીર આવ્યા છે તેમજ ઝરણાંઓ પણ વહેતા થયા છે. ડાંગના અન્ય વિસ્તારોમાં આહવામાં 31 મી.મી., વઘઈ 20 અને સુબીરમાં સૌથી વધુ 85 મી.મી. વરસાદ નોંધાયો છે. જયારે મોંડી સાંજથી સુરત શહરે તેમજ નવસારીમાં પણ વરસાદનો ધીમી ધારે આરંભ થયો હતો. જેમાં નવસારીના ચીખલી તાલુકામાં સાજે 6 વાગ્યાથી 8 વાગ્યા સુધીના બે કલાકમાં વરસાદે ધમાકેદાર બેટિંગ કરી હતી. આ બે કલાકમાં 4 ઈંચ કરતાં વધુ વરસાદ ખાબકી ગયો હતો. શુક્રવારે સવારે રાજ્યના એકપણ તાલુકામાં વરસાદ નહોતો. મોટાભાગના તાલુકાઓમાં બપોરે 2 વાગ્યા પછી વરસાદ વરસવાનો શરૂ થયો હતો.
