અમરેલી માર્કેટીંગ યાર્ડમાં સીઝનની નવી મગફળીનો આરંભ થયો હતો. અહી ખેડૂતોને પ્રતિ મણના ભાવ રૂા. 900 થી 1050 સુધી મળી રહ્યો છે. આજુ બાજુના ગ્રામ્ય વિસ્તારમાંથી છેલ્લા એક સપ્તાહથી સીઝનની નવી મગફળીની આવક શરૂ થઈ છે. તો જિલ્લાભરમાં ગત વર્ષની સરખામણીમાં 250 હેકટરમાં મગફળીનું વાવેતર નોંધાયું હતું.ચોમાસાની સીઝનમાં સૌથી વધારે કપાસ અને મગફળીનું વાવેતર અમરેલી જિલ્લામાં થઈ રહ્યું છે. પણ ચાલુ વર્ષે અમરેલી જિલ્લામાં ઉનાળામાં પણ 3502 હેકટરમાં મગફળીનું વાવેતર નોંધાયું હતું. ગત વર્ષે જિલ્લામાં ઉનાળું મગફળી 3252 હેકટરમાં જ થઈ હતી. પણ ચાલુ વર્ષે મગફળીનું વાવેતર 250 હેકટર વધ્યું હતું. હેવ જિલ્લાની બજારોમાં સીઝનની નવી મગફળીની આવકનો આરંભ થઈ ગયો છે. અમરેલી માર્કેટીંગ યાર્ડના સુત્રોએ જણાવ્યું હતું કે છેલ્લા એક સપ્તાહથી બજારમાં નવી મગફળીની આવક થઈ રહી છે.દરરોજ 50 થી 60 ગુણી મગફળી આવી રહી છે. અહી ખેડૂતોને પ્રતિ ખાંડીએ 18 થી 21 હજારનો ભાવ મળી રહ્યો છે. હજુ આગામી દિવસોમાં માર્કેટમાં નવી મગફળીની આવકમાં વધારો થશે. તો સાથે સાથે જિલ્લાના સાવરકુંડલા માર્કેટ યાર્ડમાં પણ સીઝનની નવી મગફળીની આવકનો આરંભ થઈ ગયો છે. અહી પ્રતિ મણના રૂપિયા 1080 થી 1368 ભાવ રહ્યો હતો.
