અમેરિકામાં માર્ગ અકસ્માત બાદ કોમામાં સરી પડેલી ભારતીય વિદ્યાર્થીની નીલમ શિંદેને મદદ કરવા માટે ભારત સરકાર આગળ આવી છે. આ સંદર્ભમાં ભારતીય વિદેશ મંત્રાલયે અમેરિકાનો સંપર્ક કર્યો હોવાના અહેવાલ છે. વિદ્યાર્થીના માતા-પિતા તેમની પુત્રી સાથે હાજર રહેવા માટે વિઝા મેળવવાનો પ્રયાસ કરી રહ્યા છે. વિદ્યાર્થીની હાલત નાજુક હોવાનું જણાવવામાં આવી રહ્યું છે. તે ૧૪ ફેબ્રુઆરીના રોજ અકસ્માતનો ભોગ બની હતી.
સમાચાર એજન્સી ANI એ સૂત્રોને ટાંકીને જણાવ્યું છે કે વિદ્યાર્થીના કેસ પર વિદેશ મંત્રાલય સક્રિય થઈ ગયું છે. સૂત્રોએ જણાવ્યું છે કે યુએસ પક્ષ વિદ્યાર્થીના પરિવારને ઝડપથી વિઝા આપવા માટે ઔપચારિકતાઓ પર કામ કરી રહ્યું છે. શિંદે 14 ફેબ્રુઆરીના રોજ કેલિફોર્નિયામાં એક માર્ગ અકસ્માતનો ભોગ બન્યા હતા. તેના માતા-પિતા મહારાષ્ટ્રના સતારામાં રહે છે.
આ અકસ્માતમાં નીલમ શિંદેને છાતી અને માથામાં ગંભીર ઈજાઓ થઈ હતી. તેના પરિવારને અકસ્માતની જાણ બે દિવસ પછી થઈ. તેમના પિતા તાનાજી શિંદે કહે છે, ‘અમને 18 ફેબ્રુઆરીએ અકસ્માતની જાણ થઈ અને ત્યારથી અમે વિઝા માટે પ્રયાસ કરી રહ્યા છીએ, પરંતુ અમને અત્યાર સુધી તે મળી શક્યો નથી.’
રાષ્ટ્રવાદી કોંગ્રેસ પાર્ટી (SP) ના સાંસદ સુપ્રિયા સુલેએ પણ નીલમ શિંદેનો મુદ્દો ઉઠાવ્યો હતો. તેમણે લખ્યું હતું કે, ‘વિદ્યાર્થિની નીલમ શિંદેનો અમેરિકામાં અકસ્માત થયો છે અને તે સ્થાનિક હોસ્પિટલમાં દાખલ છે. તેના પિતા તાનાજી શિંદે, જે મહારાષ્ટ્રના સતારાના રહેવાસી છે, તેમને તબીબી કટોકટીને કારણે તાત્કાલિક વિઝાની જરૂર છે.’ તાનાજી શિંદેએ અમેરિકાના તાત્કાલિક વિઝા માટે અરજી કરી છે અને તેમને સહાયની જરૂર છે.
